KUCHING: Raban indu kelebih agi indai tunggal diperansang ngaul diri ba pengawa betanam betupi dudi hari.
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah, inisiatif nya entara pekara baru dikemerat dikena nambah ekonomi raban indu kelimpah ari pengawa bejait enggau ngaga kuie.
“Aku ngelalau Gerempung Indai Tunggal Sarawak (PITSA) bejalai pengawa mansik pengelandik kaban gerempung nya ba pengawa betanam betupi ba taun 2024.
“Kemaya hari tu, pengawa betanam betupi ukai ngena changkul baka kelia lalu nengah inisiatif disedia perintah, bala indai tunggal patut ngena peluang nya minta bantu ari Opis Betanam Betupi,” ku iya.
Fatimah mansutka jaku nya rambau dirandau pemberita pengudah nerima penemuai basa ari raban PITSA ba Begunan Baitulmakmur II ditu, kemari.
Ba lansa bukai, iya nyukung inisiatif nyiri kaban gerempung nya nyadi pengajar tauka pemantu Taska PITSA.
Terang iya, nengah inisiatif nya, kaban PITSA ulih dilatih kelimpah bulih pengawa puang dikena nyungkak penatai pemisi sida ninting hari sida.
“PITSA diatu udah ngembuan dua taska, opis menteri kami endang nyukung penuh ngambi kaban PITSA ulih dilatih nyadi pemantu ba taska,” ku iya.
Pia mega, Fatimah bela nyukung program ‘transit’ ba baruh PITSA ngambi ditampung ba taun 2024.
Program ‘transit’ nya ditumbuh ngambi bala anak kaban PITSA ti dianjung ba taska deka diuwan sebedau penyaga tauka indai sida empu ngambi sida pulai.
