KUCHING: Bisi 150 deligit ari Jaipura School of Business India ngulu Program Nyain Sempekat Pemereti Ati (MOU) begulai enggau UCSI Universiti ba Hotel UCSI, ditu kemari.
Program nya digulu Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting.
Iya ti nyadi pengari ngemata program nyain MOU entara Pro Mandal Kaunsilor UCSI Kampus Sarawak, Mukvinder Kaur Sandhu enggau Tuai Direktor Jaipura School of Business india, Dr Rajiv R Thakur.
Pengawa nyain MOU nya ngaul Fakulti Pengatur Hospitaliti enggau Dagang Temuai, UCSI University Kampus Sarawak ti deka negapka agi pengawa bekunsi industri sereta institusyen nengah kerejasama akademik.
Ba program nya, pengawa nyain sempekat kunsi rasmi entara kededua fakulti nya enggau NOMS Fochun Founders Sdn Bhd bekaul palan enggau kerejasama latih.
Mukvinder nyemetak madah, kerejasama nya ngelai pengeransing begulai dikena nempa ekosistem pelajar enggau meri asil ti besai ngagai nembiak.
Pia mega ku iya, pekara nya ulih nempa graduet bepenau bepelasar ke peminta dalam industri kemaya hari.
