Industri nanas nyungkak ekonomi pekebun mit

Berekat, ngasika jaku apai, Mark mujur ngangkatka industri nanas di Saratok

SARATOK: Sinu ngenang apai diau kediri di menua ngasuh Chendang Anak Chebun, 48 taun, ngambi pemutus pulai ke menua ngibun apai iya.

“Betatika apai kediri di menua, aku mutus ati ninggalka batang pengawa di Singapore lalu mulaika diri tang apin teulihka runding ngereja pengawa betanam lebuh nya,” ku peranak Rumah Chebun, Sungai Panggau Kabo ditu.

Kenu ku Chendang tauka tampak agi dikangau Mark, iya berengkah nanam nanas ujung taun 2015 ari ansak apai iya empu ti sayauka tanah sida di Wong Besi repa ngapa nadai mansutka sebarang asil.

“Nanas terubah ditanam mansutka asil dalam bulan Oktober 2016, kurang ari setaun, nyangka ketegal tanah agi ami sereta chukup intu.

“Ba taun ke sama bulan Ogos, aku bulih bantu ari Opis Menteri Bumai enggau Industri Betanam Betupi (IADA) sereta bantu ari Kaunsil Industri Nanas Malaysia (LPNM) dalam taun 2018,” ku Mark.

MAJU… Rampa tinjau kebun nanas Mark di Wong Besi, Kabo Saratok.

Bantu ke diberi ku Mark, dikena iya nangkir pemesai dandang kebun nanas enggau meli paung ari Opis Betanam Betupi sereta ngerembaika makit ngagai bagi menua bukai.

Ngelansa pasal bansa nanas bisi ditanam iya ku Mark, Nanas MD2 bisi 15,000 pun enggau Nanas Moris lebih ari 90,000 pun sereta Nanas N36 enggau Nanas Sawit tauka Nanas Pada dalam 3,000 pun.

“Aku mega bisi nyual paung nanas ti diterenak aku empu. Paung Nanas Moris berega 30 sen, MD2 (RM3-RM4) sepun lalu aku kala bulih untung kasar lebih RM17,000 musim nanas mansau ditambah paung laku dijual.”

Mujur amat ku iya, makit nanas diatu ulih besemekih enggau sayur bansa buah bukai sereta nerima peminta tinggi ukai semina ba menua tu aja tang mega makit entarabansa.

Buah ti pelai enggau manis sereta ngundan mayuh pemaik ngagai pengerai tubuh ngasuh nanas tu dikerindu serap umur, nadai ngira biak tauka tuai.

MUSIM NGETAU… Buah nanas sedia dijual deka dipilih dulu nitihka gred.

Industri nanas entara industri pemakai ti majak dikemansang ba semua renggat sekalika ejensi, opis, palan pemansik tauka raban beranakka puku sereta pekebun mit di menua tu.

“Diatu aku nyual nanas idup nyauka selampur nengeri baka di Betong, Sri Aman, Sibu, Bintulu enggau Miri kelimpah ari di Saratok ditu empu.

“Sida ti meli nanas deka datai ngelawa kebun aku ditu, dijual ba mua penatai baka dipeda nuan sehari tu.

“Rega sigi buah Nanas Moris nitihka gred seraya MD2 deka ditimbang, RM5 sekilo,” ku iya madah silik.

Nangkan nya, asil rega nanas dalam sebulan ulih manggai RM4,000 ngagai RM7,000 lalu diketau dua kali seminggu, urung 800 igi sekali ngetau, ku Mark nampung.

“Nanas tu ulih diketau lebuh umur manggai 13 ngagai 18 bulan sereta bepanggai ba bansa nanas mega. Enti chukup jaga enggau sum, nanas deka tumbuh galak sereta mansutka mayuh asil.

“Aku disaup dua iku pekereja ti digaji RM1,200 siku sebulan. Seduai tu gawa ngintu enggau nyaga kebun,” ku Mark nyimpul randau begulai enggau Suara Sarawak.

TEMEGAH… Mark berasai temegah meda asil nanas ditanam iya.

 

PRODUKTIF… Mark ngemayuhka bansa produk nanas dijual iya, buah, paung enggau upa

 

BEREKAT… Mark ngasaika diri mujur agi gawa bekebun ari makai gaji.
BEREKAT… Mark ngasaika diri mujur agi gawa bekebun ari makai gaji.