KUCHING: Nyangka mayuh peranak Kuching enda sedar siti sukut jalai paking motosikal di kedai Tebing Ai Kuching bisi bawang ti tumbuh galak, di baruh panchar lampu jalai dia.

Chiang Bon Ching, 51 taun, bejalaika inisiatif nanam bawang ti dibuai sida ke bekedai besemak, ari tebasau ngapa nyadi uras.

“Aku teulihka runding tu laban sayau meda bawang ti udah nyumbuk enggau jai dibuai pia aja sida ke bekedai semak ditu, agi manah.

“Semua bawang ke ditanam tu diambi ari endur muai uras besemak sida ke bejual sayur, nadai ulih meli lalu tu ukai pengawa ti kamah.

“Udah empat minggu bawang tu diterenak, sumbuk bawang tauka disebut kitai buchai tumbuh galak amat lalu udah tau diambi ke lauk,” ku iya lebuh dirandau.

Ku Ching, mensia mayuh ti deka ngambi buchai tu endang nadai ditagang, nadai mega bebayar laban tuju iya endang rindu betanam lalu nadai ngiga untung.

“Anang irau pasal pekara pemeresi laban bawang ke diambi nya dulu agi dibasu beresi enggau kulit ke udah luluh dibuai sebedau ditanam. Ari ke dibuai pia aja, manah agi ditanam ulih mega mansutka asil, tumbuh nyadi buchai.

“Tu mega ulih ngelimat belanja, berekat ari pengawa di tanah taja enda mayuh tang nyampau mega asil iya,” ku Ching lebuh dirandau Suara Sarawak.

Tambah mega ku Ching, tebal agi sayur ke dibuai nya agi manah lalu ulih dikenyadi enggau diambi leka tauka paung iya.

Leka enggau paung ari sayur ke dibuai baka bawang tu nadai beleman ditanam sereta enda begunaka endur tauka taba besai.

“Baka bawang tu ditanam aku ba tanah ti digaga baka bakut ngena batu ti didijir nyadika selapat entara belakin jalai.
“Tu mega sebagi ari chara kitai ngintu rampa menua enggau ngena baru utai ke dibuai, ulah ti manah sereta patut dikemeran semua kitai ba pengidup besehari sehari.

“Anang rindu masau utai ke agi ulih diguna,” ku Ching nandu.