Inisiatif RNI dipuji Malcolm

LUBOK ANTU: Kaban Kunsil Nengeri (Adun) Batang Ai Malcolm Mussen Lamoh berasai lantang sereta temegah meda nembiak ba menua tu agi rat ngetan adat lama, main asal enggau daya idup komuniti sida.

Pengawa milih Aiman Batang Ai Resort endur ngatur pekit mega dipuji Malcolm laban ngangkat nama enggau ngelakuka Batang Ai nyadi palan ditapatka temuai.

Semua pemekit kepenudi gelar Kumang enggau Keling Raban Ngepan Iban (RNI) 2019 dikearap seruran mujur ba pengawa dikerindu sida, ku Malcolm ti mega Menteri Muda Industri enggau Beranakka Puku.

Iya mansutka jaku nya lebuh bejaku ba Pengerami Malam Pengelandik Main Asal RNI Renggat Nengeri Sarawak 2019, ditu malam kemari.

Berebak enggau nya, Malcolm udah ngagihka belanja penyampau RM20,000 dikena nyaup ngemujurka program nya.

NGETAN MAIN ASAL… Malcolm nerima tepa ari RNI ungkup kenang dudi hari.

Ngelansa pasal pekit RNI 2019, pemekit ngarika Pelilih Saratok bela menggi gelar champion ba Malam Bakat.

Thaddeus Oliver Benjamin, 21 taun, ngalahka semilan pemekit kepenudi Keling seraya Elizabeth Lydiana Bujang, 19 taun, Kumang RNI 2019 ngalahka sepuluh indu dara bajik ke bukai.

Seduai bela nadai ngadang diri menggi gelar nya tang tetap meri puji ngagai Tuhan enggau beterima kasih ngagai semua ti nyukung.

Champion pekit nerima perais mata duit RM500 disempulang trofi enggau perais bukai.

RNI 2019 udah diatur tiga hari berunggu berengkah ari 1 ngagai 3 Ogos tu tadi.

Macham pengawa beperindang ari bala penanyi tebilang menua tu baka Linda Simai, Bob Harris enggau Jaqualine Huong ngisi program pengelama tiga hari RNI 2019 diatur.

MANDING… Kumang enggau Keling RNI 2019

Suara Sarawak