Inisiatif Tr Jelaping ngatur kelas khas ba ruai patut ditunda

MARUDI: Belajar ba rumah, siti ari chara baru ba rumah panjai ditu sekumbang Atur Tagang Pejalai (PKP) awakka bala nembiak enda tinggal ba pekara pelajar.

Ba sebengkah penerang dikunsi Adun Marudi, Datuk Dr. Penguang Manggil, ba akaun Facebook iya mantaika bala nembiak mit ba sebuah rumah panjai nyinuk belajar ba ruai.

Tuai Rumah Jelaping Jali ke mega Chairman Serakup Apai Indai enggau Pengajar (PIBG) Sekula Primari (SK) Sungai Arang ngatur kelas belajar khas ba rumah panjai sida.

Ku penerang nya, kelas khas ninting lemai ungkup bala nembiak mit rumah panjai Sungai Arang dipejalai ngena iniasitif Tuai Rumah Jelaping empu.

Iya ngasaika bala nembiak sekula enda patut tinggal ba pelajar sekumbang PKP diterit berindik ari pengerekai igi penyakit Covid-19 ti udah datai ba renggat keempat.

Nengah kerejasama rat entara apai indai enggau sukung tegut bala pengajar, Tuai Rumah Jelaping mujur ngatur kelas chara online ti meri pemaik ngagai sida serumah.

Kelas khas nya diatur ba ruai, ke alai bala nembiak dipinta ngena sengkabung mua kelimpah nyaga takah enggau pangan diri lebuh belajar enggau ngaga kereja sekula diberi pengajar.

Inisiatif Tuai Rumah Jelaping tu tau ditunda peranak rumah panjai bukai ke bisi nerima sambung internet nentuka bala nembiak enda tinggal ba pelajar taja nadai nurun besekula.

Penguang mega muji inisiatif peranak Sungai Arang betuaika Jelaping ti beratka pelajar bala anak sereta meri terima kasih ngagai bala pengajar ti deka kiruh ngemujurka tuju pengawa nya.

PELAJAR LUMUR SATU… Bala nembiak nyinuk nembuka kereja sekula diberi bala pengajar nengah online maya kelas khas diatur ba ruai.

Suara Sarawak