KUCHING: Program Apresiasyen Negu Ati, Nempa Runding mujur diatur ba siti hotel tebilang ditu, malam kemari.
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah, program nya dikena ngaku bala atlit para Sarawak, gerempung ukai dikuasa perintah (NGO), bakih strategik sereta raban volunteer.
Iya madah, jasa bala atlit enggau raban bekaul ti udah ngemegahka nama Sarawak endang patut diaku.
“Jasa raban NGO, orang kediri, bakih strategik enggau volunteer ti ransing mantu mayuh serap komuniti enda ngira bansa enggau pengarap ke pemaik begulai mega patut diaku.
“Nya alai, ngari ke Perintah Sarawak, kami ba opis menteri meri terima kasih laban mujur negu ati mayuh rayat Sarawak, nempa runding sereta mai ubah positif ba pengidup sida.
“Pia mega, pekara nya mandangka sida enda kediri sereta mereti ke kitai orang Sarawak seruran nyaga sida enggau meri reti ti besai ba pengidup sida ti bisi rega diri,” ku iya.
Fatimah bejaku munyi nya ba program ti dipenyadi bini Tuai Pemegai Menua (TYT) Nengeri Sarawak, Toh Puan Datuk Patinggi Fauziah Mohd Sanusi.
Ba program nya, Toh Puan Fauziah enggau Fatimah bisi nyua setipikit enggau plak ngagai 50 Bakih Strategik Penyangga Penusah Opis Pengintu Pengelantang Komuniti Sarawak (JKMS).
Bela disua iya nya setipikit ngaku ungkup enam Kontinjen Para Olimpik Sarawak bakan Special Olympics Kuching Chapter, Special Olympics Samarahan Chapter, Special Olympics Sibu Chapter, Special Olympics Bintulu Chapter,Special Olympics Miri Chapter sereta Healthy Athletes Programme (HAP).
Seraya nya, Special Olympics Sarawak bela nerima Trofi Champion Besai Special Olympics Malaysia (SOM) National Games 2026 ungkup penyulut Kontinjen Special Olympics Sarawak ba SOM 6th National Games – Sarawak 2026.
Ba pekit nya, Sarawak mujur ngumpul 176 midul nyengkaum 56 midul emas, 68 midul pirak enggau 52 midul engkeraju.
Bela disua iya nya dua Anugerah Volunteer ungkup kategori gerempung enggau orang kediri.
Ungkup kategori gerempung dipenggi Sarawak Hun Nam Siang Tng ketegal ngatur rumah pengintu pengelantang orang tuai sereta nyendia urung 100 servis numbak bangkai komuniti ti begunaka servis nya kelimpah meri bantu pemakai ninting bulan ngagai lebih 427 ruang bilik di Sarawak.
Kategori kediri diempu Tony Pui Sin Tam ti regas bejalaika Dynasty Hotel Charity Fund kenyau ari taun 2000, meri bantu ngagai raban ti begunaka bantu serimbai pengerami, ngatur Program Goodies Giveaway Event pengelama 26 taun.
Pia mega, iya nanggam kerejasama enggau Gerempung Pengintu Pengelantang Miri pengelama 24 taun dikena mantu komuniti. – EDISI UKAS.
