MIRI: Pasukan Gerakan Am (PGA) ngerampas mayuh bansa insap enggau ai bisa dipelaba berega RM408,715 nyengkaum chukai ba Operasyen Libas ba sebuah kedai di Taman Tunku, ditu.
Operasyen tu dipejalai urung pukul 11.30 pagi ba sebuah kedai nitihka penerang di Taman Tunku ditu pagi Hari Dua tu tadi.
Pemesai Pemerintah PGA Batalion 12 Miri Superitenden Tan Hiap Seng madahka sida tetemuka 28 kutak bia enggau 56 butul ai bisa sereta 56 kutak insap mayuh bansa asil pengawa meresa ba kedai nya.
“Pengawa meresa kandang ngelingi kedai nya mega tetemuka 268 kutak ai bia enggau 644 kutak insap ba dua buah lori ngena lumur plat pelesu dikena sida ngangkut barang nadai pemendar nya.
“Kami mega mujur ngetan tiga lelaki dipechaya penyaga enggau kuli kedai nya,” ku iya nerang, ditu tadi.
Nitihka pansik, orang disangka ti ditan udah dibai ngelawa endur operasyen kedua ba genturung pendiau Taman Tunku.
“Ba operasyen kedua, sepenyampau 890 kutak ai bia enggau 69 butul ai bisa sereta 210 kutak insap ditemu ba sebuah rumah, ditu.
Nambahka nya ku Hiap Seng, insap enggau ai bisa nyengkaum chukai tu dipelaba berega RM200,000 sereta dua buah kerita dirampas tu berega RM608,715.
Semua sida disangka ngereja penyalah beumur entara 14 ngagai 27 taun diatu ditan ngambika pansik bukai dipejalai di baruh seksyen 135(1)(d) Akta Kastam 1967.
“Barang ti dirampas enggau ditan deka diserah ngagai Opis Pansik Penyalah Indu Opis Polis Pelilih (IPD) Miri ngambi atur bukai dipejalai nitihka pematut,” ku Hiap Seng.
Iya mega madahka kes tu bisi kaul enggau operasyen ti dipejalai 22 Mei tu tadi.
Dulu ari nya, polis mujur ngerampas mayuh bansa insap sereta ai bisa berega RM844,181.09 nyengkaum chukai ba operasyen ti dipejalai ba sebuah rumah di Jalai Padang Kerbau Pujut ditu.
