Insentif peransang nembiak nyulut – Doris

KAPIT: Sepenyampau 24 iku nembiak nerima insentif ari Yayasan Sarawak rambau atur Program Pejalai Pelajar Yayasan Sarawak diatur di Balai Suarah ditu.

Insentif udah disua ngagai 15 iku nembiak teulihka pemutus peresa nyulut ba SPM ti nerima RM700 siku seraya STPM RM900 siku.

Seketari Politik Kepala Menteri Sarawak, Datuk Doris Sophia Brodie udah dipebasa nyuaka insentif tu.

Seraya 324 iku nembiak ari tiga buah sekula sekondari, SMK Kapit, SMK Kapit No 2 enggau SMK Selirik bisi datai ngulu program tu.

“Tabi puji ngagai bala nembiak ti udah mujur enggau nyulut ba peresa perintah lalu insentif tu nyadika peransang ngagai bala sida enggau nembiak bukai ransing agi belajar.

NYADIKA PERANSANG… Doris nyuaka insentif ngagai Maybeline Lai Qi Jing ari SMK Kapit seraya dikemata (ari kiba) Temenggong Haji Wasli, Zamahari, Rolyn enggau Freddy Mike.

“Tu mega sebagi ari inisiatif dipejalai perintah dipegai GPS nengah Yayasan Sarawak,” ku iya.

Ku Doris, Yayasan Sarawak mega bisi meri insentif ngagai nembiak ke udah lepas sekula sekondari ti deka nampung pelajar tinggi agi.

Pengawa besekula tu beguna amat ba pengidup kitai, nya kebuah pengawa tu dikemerat berengkah ari renggat pelajar tumu, ku iya.

“Sekula tauka pelajar tu kunchi kitai ngemunas penyeranta enggau nuju pemansang.

“Kitai mega ulih ngangkatka tikas idup ti menyana agi dudi hari. Nya kebuah apai indai anang leju nyekulaka bala anak sida,” ku iya nampung.

Nangkan nya ku Doris, perintah nengeri dekaka genap ruang bilik di menua tu ngembuan penatai pemisi tinggi datai ba taun 2030.

“Rebak baru enda tau enda ngembuan penau teknologi dikena nangkup peminta pemansang dunya kemaya hari nyengkaum bepengelandik ba pengawa industri.

“Dikena nyapai tagit tu, perintah nengeri mega udah numbihka tiga buah palan pelajar tinggi peribit di menua tu baka University of Technology Curtain di Miri, UCTS di Sibu enggau Swinburne University di Kuching ngambika ulih matih bala nembiak ngena pengelandik enggau penemu ti patut,” ku iya nerang silik.

Sama datai Ketuai Penulung Direktor Bagi Pekara Scholarship Yayasan Sarawak Zamahari Haji Saidi, Pemesai Opis Pelajar Kapit Freddy Mike Engkamat, Penulung Pemesai Pelilih (SAO) Residen Kapit Rolyn Terrance, Prinsipal SMK Kapit Azlinda Mohd Nor, Prinsipal SMK Kapit No 2 Azman Hailee, Prinsipal SMK Baleh Lau Yok Huck sereta bala bukai.

NYULUT… Bala nembiak ari tiga buah sekula bela datai ngulu program Pejalai Pelajar Yayasan Sarawak diatur di Balai Suarah.