Insentif sebulan gaji ungkup staf SeDidik

KUCHING: Bala pengereja pengawa SeDidik deka nerima insentif sebulan gaji, ku Menteri Pengintu Pengelantang Pendiau, Komuniti, Orang Indu enggau Pemansang Anak Mit Datuk Seri Fatimah Abdullah.

Ku iya, Kaban Komiti Direktor Sedidik udah besetujuka sereta ngemendarka pekara nya.

“Bala pengereja SeDidik deka nerima bayar insentif sebulan gaji enggau minimum RM1,500.

“Ungkup sida ke gaji kurang ari RM1,500, sida mega deka nerima penyampau ke sama,” ku iya.

Fatimah madah munyi nya lebuh bejaku ba Pengerami Makai Lemai beserimbai enggau Anugerah Penyulut SeDidik 2019 di sebuah hotel ditu, ensana.

Berebak enggau nya, iya mega madah pengereja pengawa SeDidik deka dibayar nitihka Skim Opis Servis Perintah (JPA) tauka servis ‘N’ ti deka berengkah dipejalai kenaka 1 Januari 2020 tu ila.