Iring nembiak nyadi ketuai beguna

KUCHING: Nembiak patut diajar sereta diembing enggau manah ngambiak sida ulih nyadi ketuai ngiring menua jemah lalu nyambung legasi Sarawak ngulihka pengawa merdeka baka 22 Julai 1963.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah udah nyadi tanggungpengawa perintah, pemesai, raban NGO sereta apai indai nerenakka ulah nembiak ngambika ulih nyadi rayat ti beguna jemah.

“Juluk ati aku chukup tinggi ngagai raban nembiak laban sida tu deka nampung pengawa kitai ila lalu enti kitai enda nerenak ulah sida enggau manah, sida nadai mai pemaik ngagai menua tu.

“Enti kitai deka meda bakani chara menua kitai jemah, kitai patut meda ari sukut pemansang nembiak diatu,” ku iya lebuh dirandau Suara Sarawak kemari.

Nangkan nya ku iya, mayuh bengkah program sereta aktiviti patut dipejalai kelebih agi ngagai raban nembiak nerenak ulah rinduka menua sereta ngembuan semangat patriotik.

“Program ti nusi pengering bala pemesai kelia patut dipandangka ngambi nembiak nemu penyenang ti diulihka sida diatu ukai datai pia aha,” ku iya nambah.

Kelimpah ari nya, Abdul Karim madah 22 Julai siti ari hari ti pemadu besejarah ngagai Sarawak.

“22 Julai tu siti ari hari alai Sarawak lepas ari perintah British lalu nyadi hari besejarah lebuh nengeri tu diberi hak dipejalaika rayat Sarawak empu,” ku iya nambah.

Beserimbai enggau hari besejarah tu, pengerami Hari Sarawak diintu di Bintulu lalu mayuh bengkah program dipejalaika kelebih agi begulai enggau bala nembiak.

Datuk Abdul Karim Rahman