BINTULU: Legasi ex-Kaban Kunsil Nengeri (ADUN) Jepak, niang Datuk Talip Zulpilip terus nyadi inspirasyen ba pengawa nyungkak agenda pemansang sitak nya ti moden enggau inklusif agi.
ADUN Jepak ti mega Tuai Pampang Parti Pesaka Bumiputera Bersatu (PBB) Jepak, Iskandar Turkee madah, pemansang besai Jepak sehari tu berebak ari penegap pugu ti mujur ditempa niang ba pengawa negi pekara pelajar, hak tanah adat Vaie, pemansang menua pesisir enggau pengawa nyaga pesaka budaya.
Ku iya, jasa besai niang ba pemansang Jepak semampai dikeingat sereta nyadi inspirasyen ba misyen ngemansang sitak nya sereta enda melakang ke rega enggau pengelala komuniti lokal.
Iya madah ke diri ukai nyilih penuduk niang tang iya semina nampung legasi ti ditegika niang ti chukup ngemeratka rayat nya.
“Aku ukai nyilih penuduk niang tang nampung legasi ti ditinggalka iya.
“Jepak diatu benung ba renggat nuju jeman baru enggau moden ti begunaka penyerakup sereta komitmen semua komuniti,” ku iya nyemetak.
Iskandar mansutka jaku nya rambau Program Riang Ria Raya PBB N.67 Jepak Begulai enggau Tuai Komuniti enggau Tuai Raban Bansa (KMKK) ba siti restauran ditu, malam tadi.
Tampung iya, jasa niang Datuk Talip chukup besai kelimpah mujur mai bemacham ubah ngagai infrastruktur di Jepak.
Terang iya, nya nyengkaum projek ngaga Jematan Jepak, sekula, palan komuniti sereta inisiatif negi hak tanah adat (Vaie) ti nyadi pekara besai ba pengelala komuniti Jepak.
