Isu ai di Meradong teputar

BINTANGOR: Pengawa ngaga palan meresi ai Temadah Renggat II ditu ngayanka pengeran Perintah Sarawak nentuka peranak ditu nerima bekal ai ti chukup.

Kaban Kunsil Nengeri (Adun) Meradong, Datuk Ding Koung Hiing, madahka palan baru tu ulih ngurangka penanggul bekal ai tejanggal di pelilih Meradong enggau kandang ngelingi.

Kenu ku iya, pengawa tu mega dikena nyikap peranak enggau pemansut ai ti bisi kualiti dikena nampung peminta sida besehari sehari.

“Suntuk ai beresi entara penanggul besai ti ditapi rayat nyengkaum sitak Dun Meradong ngujungka sida napi pemar maya bekal ai tejanggal.

“Nya kebuah kitai seruran ngiga jalai mutarka iya nyengkaum ngaga palan meresi ai Temadak II,” ku iya madah ngagai media pengudah bejalai ngabas taba palan nya, tadi.

DEKA DIPERESA… Ding (kiba) nunjukka chunto ai ti diperesi ba Palan Meresi Ai Temadak II seraya dikemata Baijuri (kanan) enggau Kaunsilor Halmi Morsili.

Ku iya, palan baru nya nambahka penau Opis Bekal Ai Menua Pesisir (JBALB) Bintangor nyendiaka bekal ai beresi enggau 15 juta liter perkapita sehari dibanding semina 10 juta liter perkapita sehari sebedau tu.

Berindik ari nya ku iya, chunto ai beresi ti diijin ba palan nya deka dianjung ngagai Opis Kimia Sibu enda lama agi ngambika diperesa.

“Berebak enggau nya, aku deka nguji ngaul kerejasama Opis Menteri Utiliti Sarawak mantu kitai nyeleti batang paip ti bisi diatu. Pengawa tu beguna amat dikena mutarka penanggul batang paip pesuk ti nyadi siti ari pugu bekal ai tejanggal ditu.

“Aku ngarapka ari pemisi bekal ai baru tu semua penanggul ai di kandang ngelingi Bintangor deka diputar,” ku iya.

Sama datai Pemesai Pelilih Meradong Badjuri Bidin, Pemesai JBALB Bagi Menua Sarikei, Ir Chieng Ghin Wei, Kaban Kaunsil Pelilih Meradong enggau Julau (MDMJ) sereta bala ketuai raban bansa bukai.

NGABAS… Sida Ding dibai meda gaya operasye ba taba palan meresi ai ti baru.

 

UNGKUP PENGELANTANG… Ding enggau bala bukai begambar pengudah tembu pejalai ngabas Palan Meresi Ai Temadak II.