Isu ditapi komuniti Iban di Kuching diperunding

KUCHING: Perintah Sarawak benung ngiga chara mutar isu pengidup ti ditapi komuniti Iban ba mengeri tu ngambi ulih idup lantang baka raban bansa bukai.

Kenu ku Sapit Kepala Menteri Datuk Amar Douglas Uggah Embas, entara isu ti ditapi komuniti ke diau ba Kuching iya nya sekeda sida idup ‘setinggan’, nadai batang kereja, nadai tanah pendam enggau anak sida tepejuh ba penyalah rama baka penyalah gian dadah.

Berebak enggau nya ku Uggah, iya udah ngasuh bala ketuai raban bansa Iban di Kuching ngambi numbuhka komiti dikena ngumpul infomasyen bekaul komuniti Iban di Kuching.

Ku iya, infomasyen tu meseti disua ngagai iya ba pengujung bulan Ogos tauka ambis nadai dalam bulan September.

“Kitai ulih merambu program ti patut ngambi mantu komuniti Iban ba mengeri tu nengah infomasyen ti dikumpul nya.

“Sida mega ngembuan niat deka bulih pengidup ke manah baka bisi batang kereja, rumah, anak dianjung besekula ngambi enda tepejuh dalam penyalah gian dadah enggau pekara bukai,” ku Uggah.

Iya mansutka jaku nya lebuh dirandau pengudah ngulu Pengerami Ngenang Jasa Tuai Rumah Bagi Menua Kuching, ditu kemari.

Sama datai, Menteri Kandang Menua enggau Pengawa Berumah Datuk Dr Sim Kui Hian, Menteri Muda Kandang Menua Datuk Dr Penguang Manggil, Kaban Kaunsil Nengeri (Adun) Batu Kitang ti nyadi Chairman Kansil Kandang Menua Padawan (MPP) Lo Khere Chiang enggau Temenggung Pelilih Kuching Dato Bernard Agan Assan.

Datuk Amar Douglas Uggah Embas

Suara Sarawak