Isu setinggan diputar sampai mujur

KUCHING: Gerempung Ketuai Raban Bansa enggau Tuai Rumah Bansa Iban Bagi Menua Kuching (Pemaik) ngarapka penanggul setinggan ulih diputarka enggau manah.

Tu nyengkaum isu ke pemadu baru ba Pendam Gena tauka Pendam Tusur di Jalai Chawan, ditu.

Chairman Pemaik, Penghulu Gunting Hiang madahka naka ke tu sida udah ngumpul semua penerang ti bekaul enggau komuniti ke diau ba kandang tanah pendam nya.

“Semua penerang udah digumpul kami tang agi bisi mega sida ke apin meri penerang ngagai kami dalam pekara tu,” ku iya lebuh dirandau pemberita Suara Sarawak.

Ku Penghulu Gunting, naka tu bisi 63 pintu ke udah meri penerang ngagai Pemaik.

NAKA ULIH MANTU…Chairman Pemaik Penghulu Gunting Hiang (kiba) begulai enggau ketuai raban bansa Iban ti megai sitak Pending Penghulu Makup@Jakup Buan

“Penyampau tubuh sida ke diau ba genturung nya bisi 259 iku mensia.

“Nya ukai semina bansa kitai aja, tang nyengkaum bansa bukai ari selampur Sarawak tu,” ku iya.

Nitihka penerang, sida ti ngentap diri diau ba tanah pendam tu suba datai deka bekuli, lalu lebuh begiga ke rumah, sida nemu ba endur nya sida enda ibuh bebayarka suwa.

“Tanah nya endang ukai tanah alai berumah, sigi tanah pendam Gerempung Bansa Dayak Sarawak (SDNU),” ku Penghulu Gunting.

Lebuh dirandau bekaul enggau pengelama penanggul tu ulih diputarka, iya madahka nadai timpuh ti ulih ditetapka ba pekara tu.

“Kitai enda ulih ngeletak berapa lama timpuh ke ulih diambi dalam mutarka pekara tu.

“Kebuah pia agi mayuh pekara bukai dalam penanggul pendam tu ti sama patut diperatika kami,” ku iya.

Taja pia ku Penghulu Gunting, iya ngarapka piak ke patut kelebih agi piak atas ulih mutarka pekara tu enggau jampat.

“Enti pekara tu ulih mujur diputarka, nya siti pekara ti chukup ngelantangka Pemaik.

“Anang semina putus ba tengah jalai aja laban kami udah bebendar mai pekara tu awakka bulih perati mayuh piak,” ku iya lebuh dirandau.

Rambau pengawa randau begulai enggau komuniti ba genturung nya kenaka 12 Ogos tu tadi, SDNU minta perintah Sarawak nyendiaka tanah pendam alai nguburka orang datai ari luar Kuching ti mati ditu.

SDNU enggau Pemaik deka nentuka maya ngatur aum bekaul enggau pekara nya sebedau mantaika pemutus ngagai

Sapit Kepala Menteri, Datuk Amar Douglas Uggah Embas, ti mega ngemataka Unit Pekara Pengarap Bukai (UNIFOR).