KUCHING: Itali chakah ngaul inisiatif kuasa gadung sarawak kelebih agi ba pengawa ngalih kuasa enggau munas karbon.
Duta Besai Itali ke Malaysia, Massimo Rustico madah, pengerembai nya seraris enggau juluk global enggau Serakup Eropah (EU).
Iya madah, Sarawak diaku nyadi kandang menua ti beguna amat di Malaysia laban ngesan pangku pengawa besai ba projek ngalih kuasa enggau pemansang.
“Itali siti ari menua industri tebilang dunya, beminat deka nanggam kerejasama enggau Sarawak kelebih agi ba pengawa ngalih kuasa laban nengeri tu diaku nyadi palan kuasa besai,” ku iya.
Massimo mansutka jaku nya rambau dirampau pemberita pengudah ngatur penemuai basa ngagai Premier Sarawak, Datuk Patinggi Tan Sri Abang Johari Tun Openg di Wisma Bapa Malaysia ditu, kemari.
Tampung iya, Itali mega siti ari pemekuh besai di dunya ti ngembuan pengulih besai dalam industri enggau teknologi.
“Perintah Itali meri sukung tegut ngagai projek tu ti seraris enggau inisiatif EU dikena meransang pengawa munas karbon direnggat global,” ku iya.
Iya madah, siti Sempekat Pemereti Ati (MoU) deka disain muak ke lemai entara Sarawak enggau sebuah serikat teknologi global tebilang ti mungkur pengawa ngalih kuasa enggau kilang maju.
“Tu mih kebuah kami beminat deka bekunsi teknologi kami kelimpah nyikap diri meri sukung pekara wang ti diguna laban tu seraris enggau juluk global EU,” terang iya.
Nangkan nya, Massimo bela mantai pengandal ati iya ngagai pengulih Sarawak nyadi hab gadung lalu Itali masang juluk ngesan pangku pengawa besai ngamat visyen nya.
