Jaku English meri mayuh pengelebih, pemaik

KUCHING: Perambu ngajar subjek Sains enggau Matematik ngena Jaku English meri pengelebih ngagai nembiak sekula.

Jaku English diatu nyadi jaku ti dikena selampur dunya.

Inisiatif Suara Sarawak ninjau sereta nibak penemu bala pengajar enggau apai indai bekaul enggau pekara tu.

Siku apai ti mega gawa ba sekula, Adrian Philip, 33 taun madahka tu endang pekara ti manah ngagai bala nembiak sekula.

“Jaku English endang patut diajar ari umur biak laban tu mih maya sida jampat nerima sereta ngasika ajar.

Adrian Philip

“Subjek Sains enggau Matematik endang subjek ti patut diajar ngena Jaku English laban mayuh reti jaku ba dua bengkah subjek nya enda ulih dikalih ngena jaku bukai,” ku iya.

Ku Adrain, iya setuju enti dua subjek tu diajar berengkah ari nembiak Primari Satu ngambika sida teleba enggau subjek nya diajar ngena Jaku English.

Siku pengajar ti mega ngajar Sains enggau Matematik, Dorothy Kelunchai madah, apai indai nerima manah perambu tu laban Jaku English endang dikena sekayu menua.

“Ba subjek Sains enggau Matematik tu, tebal agi genteran jaku ngena Jaku English, semina sepil aja enda sebaka tang enti disebut, bunyi agi sama enggau Jaku English.

“Maya nembiak nampung pelajar ngagai tikas tinggi agi jemah,tu deka meri pengelebih ngagai sida laban Jaku English endang dikena ba palan pelajar tinggi,” ku iya madah nyemetak.

Dorothy Kelunchai

Ku penemu Kepala Pengajar Louis Aom, Perintah Sarawak endang udah nyikap diri ari sukut pengajar, bup teks beteknologi sereta perengka matih enggau ngajar nembiak dalam kelas.

“Taja pia, pengawa ngajar subjek Sains enggau Matematik ngena Jaku English (PPSMI) empai entu mujur taja udah manggai enam taun dipejalai.

“Bala apai indai kala nanya enti sema pekara tu dipejalai enggau berumban, sekalika deka ngemai pangka enda manah laban nadai meri awak chukup ngagai bala pengajar, nembiak enggau perengka guna ngajar sereta nyikap diri ngambika dipatih baru.

“Tu entara pekara ti suah ditanya enggau bemain ba runding apai indai laban sida nangika bala anak napi pemar,” ku iya nerang.

Berengkah ari taun 2020, Subjek Sains enggau Matematik deka diajar ngena Jaku English ba 1,460 sekula primari ungkup nembiak Primari Satu.

Menteri Pelajar, Sains enggau Pansik Teknologi Datuk Sri Michael Manyin Jawong madah, pekara tu nerima timbal manah ari semua ketuai opis bekaul.

Manyin mega deka mendingka timbal ari apai indai sereta beratika penemu sida bekaul enggau pekara tu.

Louis Aom