Jalai alun ba sitak Bukit Begunan patut diperati

KUCHING: Opis menteri ti bekaul dikearap ulih meri perati nuju pelin pemansang menua pesisir kelebih agi jalai alun nuju rumah panjai di sitak Bukit Bengunan.

Adun Bukit Bengunan Datuk Mong Dagang madahka pekara tu lebuh ngambi bagi bejuraika Rang Undang-Undang Perbekalan (2020) enggau mosyen bagi Resolusyen Angar Pemansang Belanja 2020 kemari madahka pekara tu maya Aum Kedua Renggat Keempat Dun Ke-18 ditu, pagi tadi.

“Tu nyengkaum ngaga jalai ari pasar Pantu ngagai Kerangas, Engkeranji enggau Semulong Lingga, ngaga jalai baru ari Menuang nuju Langgir Lingga sereta ngemanahka jalai ari Menangkin ngagai Simpang Kerangas, Engkeranji Lingga.

“Semua jalai ti dipadah aku tu besambung enggau Gunung Lesong National Park Lingga.

“Enti jalai alun ba pelilih menua nya manah, aku pechaya Gunung Lesong National Park Lingga deka nyadi palan ti narit ati bala temuai,” ku iya.

Tambah iya, ba baruh program Sares iya mega ngarapka bekal kuasa karan deka disambung ngagai dua buah rumah panjai di Engkerepok Lingga, sebuah rumah panjai di Langgir Lingga enggau dua buah rumah panjai di Menuang Lingga.

Nangkan nya, iya mega ngenataika bantah ngagai penumbuh Komiti Pengatur Genturung Pendiau Perintah Besai (MPKKP) ari Perintah Besai.

“Kenyau ari kelia komuniti Iban semina bisi siku aja ketuai ba rumah panjai ti deka nyadi tuai rumah lalu dipebasa bala peranak.

“Penumbuh MPKKP tu ila deka mechah penyerakup komuniti bepelasarka agenda politik ari Pakatan Harapan (PH),” ku iya.

Suara Sarawak