SARATOK: Sepenyampau RM18,000 udah diberi kena nyaup peranak ari menua Kedoh, Barit enggau Sebubu Lichok ngaduka jalai kebun sida.
Sapit Menteri Pengeluar Kuasa enggau Pengeraja Asal, Datuk Ali Biju madahka projek nyeruri jalai kebun nya deka dipejalai ngena chara beripai.
Ku iya, bisi 51 iku udah nganjung nama nyadi volunteer bejalaika Projek Nyeruri Jalai Kebun Sungai Tapang enggau Sungai Rau di Nanga Kedoh, Roban dia.
Ali diarika John Angga ba pejalai ngabas jalai kebun ti deka diseruri sereta nyuaka chek Projek Pemansang Mit Menua Pesisir (MRP) ngagai Chairman Komiti Jalai Kebun, Jollie Badi ngarika 50 kaban komiti ke bukai, kemari.
Iya ti mega Kaban Parlimen Saratok nya madah, penembu projek nya ila mega deka nguntungka peranak ari tiga buah rumah panjai; Rumah Usit, Barit Asal Roban, Rumah Roselind Lema, Sebubu Baru enggau Rumah Saba, Sebubu Supok ti sama betengahka jalai nya.
Ba lansa sama, Ali ti mega Adun Krian udah ngagihka belanja penyampau RM15,000 ungkup pengawa ngupas Sungai Bratong dikena mutarka penanggul bah ba menua nya.
Tuai Rumah Mawat ti nerima chek nya ngarika peranak dia meri besai terima kasih ngagai Ali laban udah nyaup ngatur pengawa ungkup pengelikun sida semenua.
