DEBAK: Pengawa Ngaga Jalai Paya Bakong engkeman amat dikena ngerandang mayuh agi palan betanam betupi ba Debak.
Sapit Menteri Pemansang Indu, Nembiak Mit enggau Pengelantang Komuniti Sarawak, Datuk Mohammad Razi Sitam madah, Perintah Sarawak bebendar ngemanah sereta nyeruri jalai dia ke pemaik peranak.
Ku iya, projek nya dipejalai nengah dua renggat ke alai renggat keterubah udah tembu 60.23 peratus.
“Renggat keterubah ti belabuh bulan April 2025 tembu manggai 60.23 peratus.
“Projek nengah Projek Rayat nya ngaul nyeruri jalai tanah enggau palan gadung sepanjai urung enam kilometer (km) enggau pemesai 5.5 meter seraya ngaga tiga engkelebat RC baru nyengkaum parit ba tisi jalai,” ku iya pengudah Pengawa Nyua Chek Pampas Projek Ngemanah sereta Nyeruri Jalai Paya Bakong dan Jajaran ditu, kemari.
Ku iya, projek nya disadang tembu digaga April 2026.
Ku Kaban Kunsil Nengeri (ADUN) Saribas nya, tampung ari projek nya dipejalai nengah Ejensi Pemansang Bagi Menua Betong (BDDA) udah dikemendar ungkup renggat kedua beungkus RM6 juta.
“Renggat kedua ngaul ngaga siti jematan ba Sungai Rimbas kelimpah nyeruri jalai tanah enggau jalai semin sepanjai urung 2.2km enggau pemesai 5.5 meter nyengkaum ngaga parit ba tisi jalai.
“Renggat kedua projek jalai tu disadang belabuh dipejalai renggat kedua 2027.
“Insya-Allah, pengudah semua projek ila, asil utai tanam ulih dianjung muntang agi, peluang dagang ulih ditambah enggau tikas idup komuniti deka terus mansang.
“Tu bukti pemansang infrastruktur ukai semina meri pengelantang tang mega meri awak ngagai pemansang ekonomi enggau pengelantang rayat,” terang iya.
Iya ngarap projek tu nyadi penyungkak pemansang menua pesisir ti meruan enggau inklusif agi sereta meri pemaik ngagai rebak dudi.
Iya mega meri tabi puji ngagai Opis Tanah enggau Survei (JTS) Bagi Menua Betong ti nentuka pengawa ngempu tanah lanchar.
Ke rikod, Projek Ngemanah sereta Nyeruri Jalai Paya Bakong enggau Rentayan ngaul pengawa ngempu baru tanah pemesai 21.7560 hektar tauka 115 lot tanah.
Kelai penyiru perintah ngagai hak rayat, pampas penyampau RM1,997,871.45 udah diagih ngagai 85 penerima.
