KUCHING: Dua projek ngaga jalai ba Jalai Ngemah ngelawa Temalat enggau Jalai Nanga Ngungun ngagai Nanga Ngemah di Kanowit lanchar.
Sapit Direktor Pengatur Aset, Ir Richard Tajan, madah, kededua projek nya dirumban lalu tu ngayanka pengeran piak Pengatur Tinggi Opis Kereja Raya (JKR) Sarawak bejalaika pangku pengawa dilempai ba sida.
Ku iya, udah nyadi tanggungpengawa piak JKR nentuka projek nya lanchar enggau tembu nitihka standard enggau timpuh ditetap ungkup pengelantang rayat.
“Projek Jalai Ngemah ngelawa Temalat diatu udah ba renggat kepenudi tauka manggai 78.21 peratus tembu.
“Pia mega projek Jalai Nanga Ngungun ngagai Nanga Ngemah By-Pass ti dipejalai kenyau ari 4 March udah tembu 0.85 peratus naka 25 June tu tadi.
“Pejalai kededua projek tu deka dipatau belama nentuka semua pengawa digaga enggau meruan sereta beratka pekara pengelikun ungkup mensia mayuh ti betengahka jalai nya,” ku iya.
Richard mansutka jaku nya rambau pejalai ngabas kededua taba projek nya kena Hari Dua tu tadi.
