TEBEDU: Projek Ngaduka Jalai Penyambung Kampung Semeru-Kampung Kuhom ti beungkus RM95 juta disadang nambah penyambung enggau kualiti idup peranak menua pesisir di Tebedu nengah pengawa nyendia akses jalai alun ti menyana agi.

Projek sepanjai 15.45 kilometer nya dipejalai nengah Ejensi Penyeraris Pemansang Greater Kuching (GKCDA) enggau Opis Kereja Raya (JKR) Sarawak nyadi ejensi pengatur projek nya.

Menteri Pelajar, Inovasyen enggau Pemansang Penau ke mega Kaban Kunsil Nengeri (ADUN) Tarat, Datuk Sri Roland Sagah Wee Inn mujur bejadika pengawa nasih tanah projek nya ensanus di Kampung Semeru, Jalai Penyambung Padawan-Tebedu.

Projek ti belabuh diadu kena 5 Mei tu tadi deka digaga pengelama 24 bulan lalu disadang tembu kena Mei 2028.

Rentayan jalai nya nyerangkung semilan genturung pendiau baka Kampung Semeru, Kampung Plaman Dunuk, Kampung Padus Stubot, Kampung Bisira Rayang, Kampung Kuhom Mawang, Kampung Uhom Mandeg, enggau Kampung Rudan, sereta genturung pendiau bukai ba sepanjai jalai nya.

Pengudah tembu ila, jalai nya deka ngemuntang pejalai peranak entara genturung pendiau sereta nambah tikas mobiliti komuniti ti bepanggai ba rentayan jalai nya ungkup pengawa besеhari-hari.

Pengawa nambah akses nya ulih ngemuntang peranak mindah sereta ngulihka servis sereta perengka ti diguna.

Ba konteks pemansang menua pesisir, rentayan jalai ti menyana agi mega meri impak infrastruktur pemun ti ulih nyukung ngubah tikas idup komuniti.

Kelimpah meri perengkaguna ngagai peranak, pengawa nambah jalai penyambung entara genturung menua ulih nyukung aktiviti ekonomi menua nengah pejalai barang, servis enggau peranak lanchar agi.

Jalai ti menyana agi mega ngelancar aktiviti ekonomi ba menua pesisir nyengkaum nyaup komuniti ngеna peluang dikemisi sida.

Taja pia, empas ekonomi ke bendar projek nya semina ulih diperatika enti jalai nya udah tembu sereta ulih ditengah peranak dia.

Projek jalai RM95 juta nya mega mandangka inisiatif nambah infrastruktur pemun ba kandang menua pesisir enggau pemansang jalai dipeda ukai semina nyadi perengkaguna fizikal, tang mega nyadi penyambung ngagai mobiliti enggau pengelantang komuniti.

Lebuh semilan genturung ba rentayan projek, pemaik pemansang jalai dipeda ukai diasi ke mayuh agi komuniti ba sepanjai Kampung Semeru nyentuk Kampung Kuhom.

Timpuh projek nyentuk Mei 2028 diatu nyadi perati nentuka projek nya ulih tembu diadu nitih taga seraya meri pemaik ngagai peranak baka ti dilanggar.

Sama bisi datai Sapit Menteri Pengangkut (Sungai enggau Tasik) ke mega Kaban Kunsil Nengeri (ADUN) Tasik Biru, Datuk Henry Harry Jinep; Kaban Parlimen Puncak Borneo, Datuk Willie Mongin; Residen Bagi Menua Serian, Marcos Sibong; Injinir Unit JKR Serian, Ir. Ts. Chresly Francis Kureng enggau Pegawai Pelilih Menua Tebedu, Gerard George Entigar sereta Pegawai Pelilih Siburan, Ranum Bari.—SF