SARATOK: Berekat puh gawa ba tanah pengudah pinchin gawa perintah mujur nyungkak ekonomi PW1 (RTD) Jali Anak Ngabang, 45 taun, ari Rumah Luya Seman, Kemidan Saratok.
Ku Jali, iya endang rinduka pengawa betanam ukai ungkup diri empu tang ulih mansutka asil nengah dagang.
“Aku beratika tebal agi orang nanam sayur daun enggau buah, tang jarang amat nanam serai nyadika dagang besai sida.
“Ari nya, aku nguji berati enggau ngiga makit serai tu dulu sebedau ngelanggur projek nanam serai besai agi.
“Ujung taun 2016, aku berengkah nanam serai pengudah berandau enggau siku ejen pemekal serai ba Sarikei, bekal serai tu dianjung ngagai Miri lalu diinjin nyadi produk teh serai sebedau dieksport ngagai menua Brunei, Singapore, Indonesia sereta rembus ke makit menua tasik,” ku Jali nerang silik.
Ngelansa pasal pengawa iya ke nanam serai nya, Jali madahka diri nadai kala ngulu sebarang kus tauka seminar pengawa betanam tu.
“Bai ati ransing enggau disiplin tinggi deka mujur baka orang bukai ngasuh aku mansal diri gawa, betanya ngagai bala bakih ti udah dulu ngereja pengawa bekebun lalu mujur.
“Baka orang bukai mega, tanah meseti ka ami. Kebun ke diatu nya tanah ti diperimba, semua reba kayu ditunu ngambika tanah tau ami. Paung serai dibeli aku ari bala bakih lalu diterenak.
“Ba tisi kebun mega ditanam aku pun pisang enggau sayur bukai baka cangkuk enggau chabi, dikena nambahka asil,” ku Jali.
Kebun seikar lebih pemesai ba tanah iya empu di Sungai Kali, Kabong ulih mansutka asil serai idup urung 500 ngagai 600 kg sekali ngarang, ti dijual RM3 sekilo.
“Serai tu ditanam aku berenggat lalu tau dikarang pengudah manggai 10 bulan. Aku deka ngarang serai idup dua kali sebulan nentuka serai idup ti dikarang chukup tuai sereta nyamin kualiti produk.
“Taja aku semina mansutka bekal serai idup nangkup peminta ejen lalu ukai orang ti ngempu dagang produk teh serai, tang aku chukup ngemeratka kualiti serai ti ditanam.
“Tu ukai semina enda ngerumpang pengarap ejen ti andalka kitai, tang mega nyaga nama kitai empu,” ku Jali madah nyemetak.
