SARIKEI: Kaban Parlimen Tanjong Manis Ir Yusuf Abd Wahab meri bantu RM3,000 dikena mantu Gerempung Veteren Soldadu Sarikei ngatur aktiviti sida.

Bantu nya diberi iya lebuh datai ngagai Aum Ninting Taun gerempung tu ditu, kemari.

Berebak enggau nya, Yusuf ngarapka gerempung tu terus chakah ngatur program pengelantang dalam ngaul raban sida lalu ngatur aktiviti ti meri pemaik ngagai semua.

“Jasa veteren soldadu enda ngetu pengudah sida badu gawa tang patut diguna ngambika ulih mantu rayat kelebih agi nembiak rebak baru,” ku iya.

Iya madahka, perintah ukai semina seruran meratika nasip raban ti udah pinchin tang tetap meruang ingatka jasa sida ngagai bansa enggau menua.

Ku iya, jasa raban soldadu ti sanggup begadai nyawa meruan dikeingat laban enti nadai ketegal soldadu, menua tu nyangka enda ulih maju enggau mansang baka diatu.

Pia mega, iya madahka, perintah beratika pengelantang pendiau raban soldadu ti udah pinchin ngambika sida ulih ngasaika pengidup ti meruan enggau lantang.

“Ba aku, jasa enggau bantu vateren soldadu siti pekara ti nadai banding,” ku iya.

Ngelansa pekara bukai, iya madahka komiti gerempung nya bisi ngatur agih pengawa enggau pangku pengawa ngagai sida iya.

Iya nandu, tanggungpengawa enggau pangku pengawa ti diberi nya patut dikena nitihka undang-undang gerempung.

“Umur ti udah lunggar ukai nyadi penanggul laban pekara ti pemadu beguna iya nya kerejasama enggau penyerakup ngambika ulih nyadi kunchi pemujur gerempung tu,” ku iya.

Yusuf mega bisi ngelansa pasal gaya pandemik Covid-19 ti majak ngirauka ati kelebih agi Zon Parlimen Tanjong Manis.

“Aku ngarapka semua raban gerempung diberi pengerai ti manah kelimpah terus ulih nyaga pengelantang pendiau mensia mayuh taja enda dalam raban Soldadu Malaysia agi,” ku iya.