Jematan rayat enggau perintah

KUCHING: Kaunsil Pengatur Pengawa Genturung Pendiau (MPKK) nyadika pelasar Perintah Besai bejalaika pemansang genturung pendiau ba menua tu.

Chairman Komiti Polisi Rumah Panjai Menua ti mega nyadi Kaban Parlimen Saratok, Ali Biju madahka bala ketuai MPKK ke dichiri tu deka nyadi jematan rayat enggau Perintah Besai.

“Tu nyengkaum tuju ubah ti meruan dikena nempa penyerakup entara rayat sereta nyukung polisi perintah pulaika pemaik genturung pendiau enggau rumah panjai.

“Sida ke udah dichiri mega deka muntang agi meri penerang ngagai peranak rumah panjai enggau genturung pendiau pasal inisiatif Perintah Besai baka Peka40, Bantu Belanja Idup (BSH), Projek Perumahan Rakyat Termiskin (PPRT) sereta ke bukai,” ku iya ba sebengkah penerang ditu tadi.

Ku iya, tu mega setipak enggau Juluk Bekunsi Pengelantang ditibak ari penemu Menteri Besai Malaysia Tun Dr Mahathir Mohamad ti dekaka perintah Pakatan Harapan (PH) bejalaika polisi beratka pengelantang rayat.