BINTULU: Tiga iku lelaki peranak menua tu nyangka jera kelalu laun pulai sesegau pengudah bela kena tinggang ukum sepenyampau RM1,000 siku ketegal ngelanggar Atur Tagang Pejalai (PKP) kena tengah malam tadi.
Ketuai Polis Pelilih Bintulu, Superintenden Zulkipli Suhaili madah, sida tiga tu kena tinggang ukum ketegal ditemu reregap urung pukul 12.15 malam enggau pukul 12.35 malam.
“Sida tiga ditan raban polis ba Jalai Rakawi Yusuf enggau Jalai Sultan Iskandar lebuh polis bejalaika pengawa matau nyerumba Op Covid-19,” ku iya madah ngagai Suara Sarawak, tadi.
Ku iya, sida tiga tu endang ngena perengka pengangkut diri empu ba dua bengkah jalai nya.
“Lebuh ditan raban polis, penerang ari sida tiga tu sama magang iya nya madah diri ba rantau jalai pulai ari rumah bakih sida,” ku iya.
Berindik ari penerang sida nya ngujungka sida tiga sama ditan lalu dibai raban polis ngagai Balai Polis Pelilih.
Sida tiga ditangkap bepelasarka Atur 3(1) Atur Nyeliah enggau Nagang Penyakit Berampit (Atur Sitak Dirampit) 2020.
