JKR udah dipinta nyeruri jalai – Wilson

Enam rumah panjai, dua sekula merinsa nengah jalai jai

“Penusah tu udah dipadah aku ngagai JKR ngambika sida nyendiaka puku dulu dikena ngaduka jalai nya.”

PELAGUS: Urung enam buah peranak rumah panjai nyengkaum dua buah sekula merinsa nengah jalai jai ari Nanga Pelagus nyentuk ke Rumah Jalit, Pasir Nai lalu dua buah sekula iya nya SK Nanga Pelagus enggau SK Nanga Peraran.

Apin lama ke udah diak nengah laman rama baka Whatsapp enggau Facebook mensia mayuh bekunsika siti video sebuah hilux benung niti batang dikena ngelayang sebuah sungai.

Ba video nya, sebuah hilux dipeda begadai niti batang kelimpah bisi mega dipeda orang bukai nyaup deriba beratika batang ke dititi.

ENDA LIKUN…Gaya jalai ke chukup merinsa ditengah peranak Nanga Pelagus.

Jalai tauka jematan ke jai tu ditengah enam buah rumah panjai iya nya Rumah Jalit di Pasir Nai, dua buah rumah di Nanga Pelagus iya nya Rumah Bujah enggau Rumah Kaya enggau tiga buah rumah di Nanga Benin iya nya Rumah Achong, Rumah John Ason enggau Rumah Belaja.

Lebuh ditanya pengarang berita diak Kaban Kunsil Nengeri (Adun) Pelagus Wilson Nyabong Ijang madah udah minta Opis Kereja Raya (JKR) ngaduka jalai ari SK Nanga Pelagus ngelawa Rumah Jalit, Pasir Nai, Pala Wong di Pelagus.

Kelimpah ari nya iya udah madah ngagai JKR sereta kala nulis surat minta kompeni ngereja kayu batang ke besemak nyaup ngaduka dulu jalai nya.

“Penusah tu udah dipadah aku ngagai JKR ngambika sida nyendiaka puku dulu dikena ngaduka jalai nya.

“Pia mega, kompeni ngereja kayu sebedau tu udah besetuju ngaduka jalai nya tang nyentuk ke sehari tu empai diputar enggau lengkas,” ku iya

Ku Wilson, dalam kandang minggu tu mega iya deka mai bala JKR ngelawa palan nya nentuka penyampau belanja dikena ngaduka jalai tauka jematan nya.

“Belanja ke dikena ukai seratus dua. Bejaku aja senang tang kami ke nyadi pengari rayat naka penyampat mutarka penusah baka tu,” ku iya madah.

Wilson Nyabong Ijang

 

JALAI BELUBANG…Siti agi jalai ke balat rusak di sitak Pelagus iya nya jalai ari Kerangan Ara ke Rumah Sekudan, Ulu Pelagus sereta suah ditengah bala nembiak sekula SK Ulu Pelagus, suah diseruri tang agi jai.