Joseph Blandoi dichiri nyadi pemangku menijar besai Salcra

BETONG: Peranak Bisaya ari Limbang Joseph Blandoi, 53 taun dichiri nyadi Pemangku Menijar Besai Kaunsil Pengimpun enggau Penyaga Tanah Sarawak (Salcra) berengkah 1 Januari tu tadi.

Blandoi, sebedau tu mangku pengawa nyadi Sapit Menijar Besai dipadu ngisi penuduk ke udah puang bekau Ex-Menijar Besai Datuk Vasco Sabat Singkang ti udah pinchin kena bulan Disember 2019.

Sapit Kepala Menteri Datuk Amar Douglas Uggah Embas ti mega nyadi Chairman Salcra madahka pekara nya rambau pengawa aum begulai enggau pengari pengempu tanah ladang Saribas ba opis nya di Simpang Layar, kemari.

Ku Uggah, iya andalka Blandoi ulih mai pemansang ti baru ngagai Salcra.

“Iya udah dianjung nyereta kus dua bulan dalam pengatur moden di Harvard, USA iya nya siti universiti pemadu manah dunya.

“Kitai deka Salcra ba jalai ti betul sebedau ngemendarka nya ngemansangka mayuh agi tanah Hak Adat Bumiputera (NCR),” ku iya.

Berebak enggau nya, Blandoi ti mega landik bejaku Iban madahka iya ngembuan dua fokus besai ngagai Salcra.

“Dua fokus tu iya nya nambahka mayuh agi pulai ari ladang dikemisi kitai lalu nambahka mayuh agi pengelandik bala pengereja ari tiap renggat.

“Kelimpah ari nya, kami bisi lima teras strategi dikena ngemansangka Salcra,” ku iya.

Suara Sarawak