KUCHING: Opis Betanam Betupi Sarawak (JPS) dikeandal ulih ngubah chara enggau tunga kuing dikena negapka agi pengawa komersial industri nya di Sarawak.
Menteri industri Pemakai, Komoditi enggau Pemansang Wilayah (M-FICORD), Datuk Seri Stephen Rundi Utom madah, pekara nya beguna amat laban pengawa betanam betupi diatu ukai semina meri perati ngagai utai tanam tang patut meda ari sukut chara ngelakuka asil kebun.
Iya madah, ba pekara ngelaku produk, Gerempung Orang Bumai Nengeri Sarawak (PPNS) enggau Gerempung Orang Bumai Genturung (PPK) dikearap ulih ngatur chara mantu bala pekebun.
“Kitai patut ngeranchakka agi pengawa ngelaku produk kebun laban kitai ngasuh pekebun nanam, sida pen nanam, kitai ngasuh sida ngatur, sida pen ngatur. Tang dikena ngelakuka asil tu baka ni?
“Nya alai, kitai patut ngena manah fasiliti begunan baru PPNS di Kota Samarahan ti beungkus RM17 juta dikena negapka agi produk kebun sereta nyeliah pengawa masau asil kebun,” ku iya.
Dr Rundi mansutka jaku nya rambau bejadi Hari Tebuka Palan Pemansik Betanam Betupi (ARC) Semongok 2024 di ARC, Jalai Puncak Borneo ditu, sehari tu.
Ngelansa pasal hari tebuka nya, iya ngelalau mensia mayuh ulih nemuai ngagai ARC Semongok ngambi bulih penerang pasal pengawa betanam betupi enggau makmal ditu.
“Ba program dua hari bejurut (4 nyentuk 5 Oktober) tu, kitai ngena peluang tu nerang ngagai komuniti pasal pekara ti patut digaga ditu.
“Tu nyengkaum ngulih penerang pasal pengulih produk enggau asil ti ulih dikomersial,” ku iya.






