Juluk bulih tingki baru tejapai

BINTULU: Pengingin deka bulih tingki nyadi nyata pengudah dua orang tuai nerima tingki ari Opis Pengrejister Bansa (JPN) pengudah nganti lebih 30 taun ba Bagi Menua Bintulu, kemari.

Lembang Bulie, 50 taun enggau menyadi indu iya Nerita Gelinggi Bulie, 49 taun berasai chukup gaga pengudah nerima dokumen ke beguna nya ari Pemesai Pengerijister Bansa Bagi Menua Bintulu, Ali Hassan ba JPN Bagi Menua Bintulu ditu.

Lebuh dirandau, Lembang madahka diri bepanggai ba tingki sementara chura gadung sebedau tu lebuh deka mindah ke bukai.

Iya madahka diri nadai tingki chura biru taja diada ba Malaysia.

“Ketegal irauka penusah ti nyadi dudi hari, aku alu nganjung peminta ngulihka tingki nya.

“Sebedau tu, peminta ngulihka tingki nya enda dikeibuh piak bekaul.

Lembang madah, bulan Januari tu tadi anak lelaki iya benama Albert Lembang ngaga pemutus deka ngulihka bantu ari Kaban Parlimen Bintulu, Datuk Sri Tiong King Sing.

Nangkan nya, Lembang madahka pemujur tu datai ari bantu Pemesai Khas Kaban Parlimen Bintulu, Steven Kong Kai Seng lebuh iya nganjung peminta ngulihka tingki baru.

Udah nya, Steven nganjung peminta ngagai Pemesai JPN Bintulu ungkup atur bukai.

Berasai chukup gaga laban sehari tu aku nerima tingki chura biru ti suah dipinta aku ngelama tu ngagai JPN.

Pengudah bisi tingki tu, aku ulih mindah ngagai menua luar nyengkaum ngatur mayuh pekara,” ku iya enda ngetu meri terima kasih ngagai Ali enggau Steven.

Suara Sarawak