KUCHING: Lumba Olimpik Khas Sarawak Ketujuh 2025 udah tembu, pengudah ngemata 358 iku atlit khas bepekit ba pekit lumba enggau main pengelama tiga hari berunggu.
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah ke diri gaga laban juluk ngatur pengawa lumba enggau main nya udah mujur dijapai, nyengkaum nyendiaka peluang ngagai atlit nyelai pendiau runding masuk lumba enggau main.
“Atur pengawa baka tu ulih negapka atlit ari sukut ngansah penau enggau pengulih sida, seraya mantaika penau baru.
“Puji Tuhan, kami meri puji ngagai pengawa sida, kami meri anugerah ngagai semua atlit tu, ari sida ti champion deka nerima midul lalu sida ti enda menang deka nerima pin.
“Tu dikena ngaku pemerani sida nguji nipak ke semangat sulu jaku lumba enggau main tu ‘awak aku menang. Tang enti aku enda menang, aku berani nguji’,” ku iya.
Fatimah bejaku munyi nya lebuh dirandau pemberita pengudah meda hari kepenudi Lumba Trek enggau Padang serimbai Lumba Olimpik Khas Sarawak Ketujuh 2025 di Stadium Negeri Sarawak, Petra Jaya, ditu, kemari.
Ku iya, lumba enggau main tu mega ngasuh nembiak mit enggau raban ti begunaka kereban khas negapka diri.
“Tuju lumba enggau main tu ngambi sida ngasaika pengelantang sereta meri pengandal enggau penampak baru ba pengidup sida.
“Nengah pengawa masuk lumba tu, atlit khas mega bisi peluang begulai, betemu enggau kaban baru sereta begulai baru enggau kaban lama enggau penuh pengaga,” ku iya.
Berebak enggau nya, iya madah ke sepanjai pengawa lumba enggau main nya, sida meda apai indai bejalaika tanggungpengawa ti besai nengah chara meri sukung rat ngagai bala anak sida.
“Bisi apai indai ti sanggup nyadi volunteer ngena pengelandik sida mantu kami, sekali ke ba sukut teknikal tauka pengawa bukai. Tu peluang ti manah.
“Atlit khas kitai ti nyulut sekali tu mega deka ngari ke Sarawak ba Lumba Olimpik Nasional Khas Malaysia di Ipoh, Perak bulan June tu,” ku iya.
Ke rikod, Lumba Olimpik Khas Sarawak Ketujuh ti diatur Pampang Lumba Olimpik Khas Kuching udah diatur kena 2 ngagai 4 Mei tu tadi.
Sekali tu, lumba enggau main dipekit iya nya main bol, nyemerai, bocce, tenis mija enggau boling tenpin ti ngaul penyereta atlit ari lima bagi menua di Sarawak iya nya Kuching, Miri, Sibu, Bintulu enggau Kota Samarahan.
