BAU: Projek Tebing Sungai Siniawan ti lama udah dianti, beungkus RM10.8 juta udah dipenyadi nyerumba bemacham pengerami besai ba kadang menua pesaka Pasar Siniawan.

Kaban Kunsil Nengeri (ADUN) Serembu, Miro Simuh madah, penembu projek nya nyadi mimpi nyata ngagai komuniti menua nya pengudah betaun sida nganti.

“Pengudah nganti ba timpuh ti lama baka tu, kami udah bisi tebing sungai baka juluk ati kami.

“Projek ikonik tu deka nambahka sejarah ngagai Siniawan sereta ngangkatka agi pematak palan tu nyadi sebuah kamdang menua pesaka manah,” ku iya.

Miro bejaku munyi nya rambau pengerami bejadika Tebing Sungai Siniawan, ti diatur serimbai Pengerami Muzik Bagi Menua Siniawan, ngintu genap taun ke-185 Pasar Siniawan enggau ngintu taun ke-15 Pasar Malam Siniawan ditu, kemari.

Iya madah baru, Siniawan majak nyadi palan ti dikerindu bala temuai, kelebih agi maya ujung minggu mungkur 40 peratus temuai datai ari Kalimantan, Indonesia. Ku iya, tebing sungai baru nya deka negapka agi penuduk Siniawan nyadi hab dagang temuai ti nyelai.

“Taja Siniawan mit sereta besemak enggau mengeri Kuching tang pemanah pesaka asal enggau rumah kedai ti dijaga matak penatai temuai ari menua tu enggau antarabansa.

“Tebing sungai baru tu meri semangat baru ngagai kitai ngetanka main asal kitai seraya angkunka pemansang ungkup rebak dudi,” ku iya.

Iya mega ngerintaika sekeda projek di baruh Ejensi Pemansang Koordinasyen Greater Kuching (GKCDA) ungkup sitak Serembu iya nya Siniawan Multilevel Parking & Center Hakka beungkus RM28 juta, Taman Industri Nginjin Pemakai Serembu di Paku berega RM40 juta, Projek Palan Nyayat Jani (Abbatoir) ti berega RM30 juta, Projek Nupi Chapi Begulai ba Kampung Seromah enggau Kampung Kandis ti beungkus RM15 juta, Projek Pemansang Dagang Temuai beungkus RM10 juta enggau Ngemanahka Jalai Lama BauKuching.