KUCHING: Gerempung Kerejasama Koperkasa Sarawak Berhad (Koperkasa) udah ngemendarka dividen 11.75 peratus ngagai urung 25,000 iku kaban selampur Sarawak.
Nitihka penerang berita ari gerempung kerejasama nya tadi, pengawa ngagihka dividen nya udah dikemendarka Komiti Besai Gerempung Kerejasama Malaysia kena 3 Mei 2021.
Dividen enggau untung deka dibayar nitihka penyampau udah ditetapka iya nya Dividen Puku Syer 6 peratus tauka RM2,463,882, Dividen Puku Bayar Ninting Bulan 4 peratus (RM2,842,161) enggau Untung Duit Simpan 1.75 peratus (RM306,103).
Nambahka nya, ripot wang taun kepenudi kena 31 Disember 2020, Koperkasa ngerikodka untung beresi sepenyampau RM8,852,377.
Dividen nya tau diambi nengah tali arus tauka online enggau rejiter nyadi penguna portal myKOPERKASA tauka ngisi Pom Peminta Ngeluarka Dividen ti tau diambi ari semua opis Koperkasa di Sarawak.
Pom nya mega tau dibatak ari web Koperkasa empu ba www.koperkasa.com.my ke alai bayar deka dipejalai nengah online ti dipasuk terus ngagai akaun bank kaban gerempung nya.
Dividen enggau untung dibayar tau dikeluar berengkah pagila, 6 Mei 2021.
