Kain Buriek: Pesaka Asal Batang Rajang

BETONG: Siku pedagang kraf, Louis Kelaman, 32 taun, ti rejista enggau Kaunsil Pemansang Kraf Jari Malaysia Pampang Sarawak mujur ngatur Bengkel Nyait Kain Buriek, ensanus.

Ku Louis, bengkel mujur diatur ba Rumah Manggie Ugat, Tanjong Baru di Paku Spaoh, Betong ditu lalu udah digulu 30 iku penyereta datai ari raban indu enggau indai tunggal ti diau besemak enggau menua Paku.

Louis madah tu sebagi ari pengawa ngetanka pesaka asal menua tu kelimpah ngaul peranak rumah panjai kelebih agi raban indu ba pengawa pengelandik jari.

NGIRI PENEMU

Kitai nyadi raban pengatur berasai lantang meda pemanah timbal enggau sukung bala penyereta ti datai laban deka ngiri penemu.

MANDING… Raban indu nguji ngerasukka kain enggau selampai buriek asil ari jari Louis Weslly.

“Bala penyereta gagit amat deka belajar chara milih kerubung kuyung, nero langkar atas kain baldu enggau nyait kerubung kuyung nitihka langkar tadi.

“Tu mega nyengkaum penemu ngelapik kain, milih bansa enggau penebal kain ti nemban digagaka kain buriek enggau pemesai lambar ubung sereta chara nyimpul ubung ba ujung kain.

“Macham mega tanya dibantaika bala penyereta lalu kitai naka ulih nyaut enggau ngajar sida, bekunsika penemu dikemisi,” ku Louis.

Tambah mega ku Louis, asil kain buriek ari bengkel dibai sida pulai, nyadika kenang enggau tepa, pengingat sida udah ngulu pengawa kitai.

NYAPAI JULUK

KENANG RAMA… Tim Louis Weslly begambar bebala mayuh begulai enggau penyereta bengkel.

Kitai temegah ati meda bala penyereta bulih penemu ari bengkel diatur kitai seraya kitai ngempung sida tu begulai, bekunsika penemu enggau ngajar pangan diri dataika landik.

Batang tuju bukai bengkel mega dikena ngerapitka sintal kaul begulai enggau pangan diri sereta nyadika tenggau ngagai bansa bukai nyengkaum sida ke diau di mengeri enggau ulu sungai.

“Endang udah juluk aku kenyau ari ngepunka pengawa mantu raban indu enggau indai tunggal bisi pengeransing enggau pengangkun ngaul diri ba pengawa begunaka pengelandik jari tu.

“Asil ari pengawa tu ukai semina nyadika pemandang aja tang ulih dijual ngambi mansutka belanja ngagai ruang bilik sida, nyadika belanja tambah sereta nyungkak ekonomi menua pesisir,” ku iya madah nyemetak.

BISI PEMINTA

JAMPAT NANGKAP… Bala penyereta bengkel gagit nembuka asil kain buriek sida.

Kitai nemu dagang kraf jari kelebih agi kain buriek nerima peminta tinggi ukai semina dalam makit menua tu aja, tang datai ke Semenanjung enggau Sabah.

Lalu kitai bisi amat pengandal, dagang tu ulih rembus ngagai makit entarabansa jemah enti bisi saup ari raban ejensi bekaul, bela keran ngangkat dagang kraf tu.

“Bisi peminta reti iya bisi peluang dagang dikerembai datai ke tikas entarabansa. Kitai deka meda kraf jari bisi kualiti lalu ulih dijual nengah strategi makit luar.

“Tu mih juluk kitai ngelama tu lebuh ngelanggur pengawa,” tandu Louis.

PUH… Louis nerang chara ngelapik enggau nyait kain buriek ti betul ngagai bala penyereta bengkel.
NGEMBING… Louis Weslly meri chunto baka ni ngepunka pengawa nusun tekuyung buriek.

PESAKA ASAL BATANG RAJANG

 

Kain buriek ke amat datai ari menua Batang Rajang, sebansa pekayan asal nyauka lenyau diseruyut jeman ti jampat mansang.

“Enti enda dibai ati keran, puh betanya, nyangka kain buriek tu semina deka tinggal kenang aja, enti sema bisi dipeda rebak dudi semina ba rumah mijum aja mih.

“Nya kebuah kami dulu nyelinting raban indu di rumah panjai nyadi pemungkal program kraf baka tu laban kitai nemu sida tu bela ransing ati belajar baka kitai, sereta puh ngereja pengawa baka tu,” ku Louis.

KEREJASAMA RAT

Raban pengatur mega meri tabi puji besai ngagai Tuai Rumah Manggie Ugat ti udah bekerejasama enggau nyendiaka palan ngatur bengkel sereta meransang nembiak redak iya enggau peranak rumah bukai ngulu bengkel nya.

Ku Louis, kerejasama rat peranak Rumah Manggie mega ngasuh sida berasai lantang ati lebuh ngatur pengawa datai ke tembu.

“Ukai semina kemerah enggau bebasaka temuai, sida serumah mega nadai belampung ati nyaup kami nyendiaka endur ngatur bengkel sereta penatai kami dilalu baka temuai bukai.

“Basa sida serumah ngemai reti chukup besai ba kami lalu tu teladan pemadu manah ngagai kami rebak baru. Berekat ari kerejasama semua pengawa dikereja naka pemujur,” ku Louis nyimpul jaku diri lebuh dirandau Suara Sarawak.

SERAKUP… Penyereta bengkel begambar bebala mayuh ungkup kenang dudi hari pengudah bengkel tembu.

 

NUNDA… Siku penyereta ngingatka chara nyait kerubung tekuyung buriek nitihka langkar.

 

NALI PENGAWA TUAI… Sekeda ari 30 penyereta ti ngulu bengkel nyait kain buriek.