Kangau ngabang kelai basa ngagai DBK

KUCHING: Raban Dayak Bukit Kelingkang (DBK) betubuh 25 iku nangkup kangau ngabang Pengerami Main Asal Dayak (FBD) Ke-1 2019 di Bengkayang, Kalimantan Barat, Indonesia ujung minggu nyin tadi.

Pejalai sida sebuat diuluka pemungkal begulai Insol Harry, Lawrence Clement Ahsay enggau Victor Ason mai ati ransing sereta gagit nanggam teguh agi kaul serakup enggau bala menyadi di menua nya.

Pengerami lima hari berunggu, berengkah 7 ngagai 11 Julai tu tadi diatur nyerumba pengawa bejadika kompleks Rumah Adat Dayak digelar Ramin Bantang Bengkayang ba Jalai Raya Sanggau Ledo, Kelurahan Sebalo, Kacamatan Bengkayang di Kabupaten Bengkayang.

Pengawa bejadika rumah adat udah mujur dipenyadika Gabenor Kalimantan Barat, H. Sutarmidji ngena pangkung tawak dikemata Bupati Bengkayang, Suryadman Gidot sereta bala temuai dipebasa bukai nyengkaum pengari ari raban DBK Sarawak enggau selampur Kalimantan Barat.

Ku Victor, tu basa chukup besai ari bala menyadi Dayak di menua nyin kelebih agi Dewan Adat Dayak (DAD) diarika pak Abet Nego ti udah ngangauka bala kitai ari menua tu ngulu pengerami besai sida.

RAMI… Pupu bansa datai ari serap menua Kalimantan Barat nyengkaum pengari ari Sarawak nedat laman besai Rumah Adat Dayak Ramin Bantang di Bengkayang ti baru dipenyadi nyerumba pengerami nya.

“Enda ulih dirintai ngena leka jaku pemanis kenang kami sebuat ti disambut enggau ati lantang baka nyambut pemulai menyadi diri empu ari belelang.

“Ari basa, kemerah, pemanah budi enggau penyiru sida ngasuh ati betah diau dedin taja enda lama tang chukup ungkup dikenang dudi hari,” ku Victor.

Pegari di Mata Dunya

Nya kebuah Victor ngarapka ulah bala menyadi bansa Dayak di Kalimantan tu nyadika teladan enggau chunto pemadu manah ngagai kitai bansa Dayak kelebih agi di Sarawak.

“Sida din ukai semina kering jaku enggau penemu ba pengawa ngetanka adat enggau daya idup kitai bansa asal, tang mega chukup angkunka kaul serakup sereta besukungka pengawa pangan diri, bisi ati ibuh enggau deka kiruh ngemujurka semua pengawa.

DEDAT… Pemayuh tubuh pengabang ti datai ngemujurka pengerami FBD keterubah di Bengkayang ujung minggu nyin tadi.

“Nadai ngira pengarap enggau penatai menua, sida endang besukung betulung, beduruk ngereja pengawa laban ari duruk baka tu pengawa deka lempung sereta mujur.

“Nama kitai bansa mega deka pegari di mata dunya ketegal peneguh kaul serakup baka dunya meda tajau singaraja,” ku Victor madah nyemetak.

Ngarika sida sebuat, Victor diangkat nikika panggau besilih tepa entara DBK, Sarawak ngagai Ketuai Panitia FBD, Ibu Neneng M. Sos kelai basa ngagai temuai ari luar ti nyukung tegut pengerami besai sida.

“Besai terima kasih enggau tabi puji ngagai semua kelebih agi Pak Abet sebilik ti udah ngemujurka pejalai bala kami, ari endur diau, pemakai sereta bejalai ninjau rampa menua.

“Lalu kaul ti udah ditanggam rat deka ngemai kitai seati enggau sepenemu ngempung raban bansa Dayak selampur Borneo nipakka tuju enggau juluk DBK,” ku iya madah nyemetak.

KENANG ARI SARAWAK… Victor (kanan) nyuaka tepa ari DBK ngagai Ketuai Panitia FBD, Ibu Neneng M. Sos (tengah) seraya dikemata pengari DAD, Pak Abet Nego (kiba).

Tibak Jaku Lalau

Berambaika jaku ‘Adil Ka’ Talino, Bacuramin Ka’ Saruga, Basengat Ka’ Jubata’ asal ari bansa Dayak Kanayatn ngemai reti besai sereta meri peransang enggau semengat ti patut diteladan kitai bansa Dayak di menua tu.

Genteran jaku nya ku Victor tau dikumbai nyadika lalau enggau tenggau ba pengidup kitai siku-siku.

Genteran keterubah ‘Adil Ka’ Talino’ ke alai leka jaku ‘Adil’ ngemai reti sama pemayuh, bela penyampau, enda bepiak tauka enda bechiping ba semua atur pengawa, reti ‘Ka’ tu ngagai, lalu jaku ‘Talino’ meri reti mensia.

“Tau disimpul kitai genteran jaku tu ngayanka Dayak Kanayatn chukup bebasaka ulah ti lurus, nadai nyiping ba pengawa.

SEMENGAT DAYAK… Raban DBK begambar ungkup kenang begulai enggau pengari DAD, Pak Abet Nego (bediri, tengah).

Kedua ‘Bacuramin Ka Saruga’, ke alai leka jaku Bacuramin tu ngemai reti cheremin, penemu enggau kuing running lalu jaku ‘Saruga’ tu serega ku kitai Iban lalu kitai nyimpul jaku tu ngemai reti nangika Petara, ngasika ajar Tuhan lebuh ngereja sebarang pengawa.

Lalu ketiga ‘Basengat ka Jubata’ tu ngemai reti Beridup tauka enseput (Basengat) ba jari Tuhan (Jubata’) ke alai mensia ti idup ba dunya tu pechayaka seput tauka idup mati sida bepanggai ba jari Tuhan.

Ari ketetiga reti genteran jaku nyin tadi, kitai ulih nyimpul reti tu iya nya kesatu, kitai mensia patut lurus, angkunka pemanah kaul diri sebilik enggau diau bebaik, nyadi ngereja ulah ti ditagang Tuhan, ngasaika pengidup ti meruan sereta enda nangika nyawa lesi enti negika pekara ti betul laban idup enggau mati mensia di jari Tuhan.

Kenang Manis

Ngelansa pejalai ke Bengkayang, sida sebuat napatka garis entara menua di Pos Kawalan Imigresyen Serikin, Bau lalu nampung pejalai ngelawa menua Bengkayang urung dua jam lebih pejalai ngena kerita 4WD.

“Pejalai kami tau dikumbai lanchar taja tebal agi ngerenchah jalai ladang sawit laban diiring raban ari DAD, nentuka pengelikun enggau pengelantang kami ti nyadi temuai diintu meruan.

“Datai di Bengkayang, kami lalu dibai ngagai endur bemalam ba Hotel Lala Golden Bengkayang lalu ngetu belelak sebedau dibai bejalai ninjau rampa menua.

“Pagi hari nyadi kami nyikap diri nyereta pengawa bejalai bebala mayuh ngarika Sarawak nyempulang raban bukai ti nyadi rintai pengerami dianti bala mayuh.

“Kursemengat laban pengelikun pejalai pulai mansang kami sebuat endang dijaga,” ku Victor madahka diri lantang enggau sambut baka nya.

Enda kurang mega ku Victor ba basa sida ngenahka pemakai ngagai bala temuai, endang nadai penimpang.

“Taja nadai entu mayuh bida bansa pemakai tang basa sida ngasuh kitai ngasaika diri diintu siru sereta diterima enggau ati senang,” tandu iya.

Entara rintai atur pengerami baka Karnival Seni Kalbar enggau Pengawa Bejalai Bebala Mayuh Tangkit Pemadu Mayuh, Penerang Ngenegapka Adat Istiadat Dayak, Pengawa Mandangka Produk Tebilang Pelilih Menua enggau Tengkebang Inovatif Pemerintah Pelilih Menua, Seminar Adat enggau Budaya sereta Kalimantan Barat Night and Fun 2019.

Suara Sarawak