Kapit richah ujung minggu tu Safari Rakit Baleh – Kapit 2019 datai baru

KAPIT: Safari Rakit Baleh – Kapit 2019 Renggat Ke-24 deka diatur berengkah ari 5 nyentuk 7 April tu.

Safari Rakit Baleh 2019 tu deka meleka ari Rumah Lugat, Nanga Senawang, Sungai Majau kena 6 April lalu kena 7 April, penyereta safari tu deka meleka ari Rumah Ekau, Nanga Mujong, Baleh lalu nuju adan lumba Penyangkai Express Kapit.

Kelimpah ari nya, lumba bot laju mega bisi diatur nyerumba pengerami tu ila.

Entara kategori ke bisi diatur sekali tu iya nya Bot Tunnel 50 HP enggau ke mit agi, Bot Tunnel 30 HP enggau ke mit agi, Injin Pam 8 HP, Bot Tunnel 35 HP, Bot Tunnel 18 HP, Bot Tunnel 35 HP sereta Bot Tunnel 35 Piston.

Ukai semina nya aja, peranak menua bukai mega udah ngenukuka diri datai nyereta lumba bot laju tu baka ari menua Brunei.

Tu nyengkaum rayat pupu bansa nadai ngira bansa Iban, China, Melayu enggau ke bukai sama enggau ngulu pengerami besai tu.

Tu siti ari chara peranak Kapit mandangka pesaka asal menua dikembuan sida nyengkaum pemanah rampa menua sereta kaul bebaik enggau temuai ke bisi datai nemuai kitu.

Bala penyereta pekit bot laju diatu benung kiruh matih diri ngujika bot enggau injin sida ba tebing ai Batang Rajang nyerumba pengerami ke deka datai tu.

 

GAGIT… Sekeda ari tim bot laju nyereta pekit nyerumba Safari Rakit Baleh-Kapit 2019. – Gambar pengias.

 

NANJAK WONG… Bala penyereta berakit ngili sungai napatka adan di Penyangkai Express Kapit. – Gambar pengias.