SERIAN: Sekula Sekondari (SMK) Taee ngatur Karnival Lumba enggau Rekresyen Pra-U SMK Taee nengah tuju meri peluang enggau ngansah bakat bala nembiak dalam lumba.
Prinsipal SMK Taee, Julius Mundor madah, program tu mega diatur ungkup narak penyerakup enggau gaya pengidup ti bepengerai ngagai bala nembiak.
“Program tu nipakka leka jaku ‘Siku Nembiak Siti Lumba’ dikena meri perati pasal pemesai guna nembiak ti chakah ngaul diri ba lumba.
“Tuju pemadu besai karnival tu dikena nerenak gaya pengidup ti bepengerai, negapka penyerakup enggau kerejasama sereta mandangka ulah nyadi tuai bala nembiak,” ku iya.
Julius bejaku munyi nya rambau bejadi Karnival Lumba enggau Rekresyen Pra-U SMK Taee ba Padang enggau Gelanggang Lumba SMK Taee kena 10 Oktober tu tadi.
Program ti dipejalaika dua hari berunggu (9 enggau 10 Oktober) nya digulu urung 1,700 nembiak enggau 130 pengajar sereta raban sekula.
