SIBU: Perambu ngemasukka Karnival Main Asal Durin ba Kalinda Dagang Temuai Sarawak endang dianti laban penyampau temuai ti ngulu pengerami nya majak nambah ninting taun.
Menteri Dagang Temuai, Seni enggau Budaya, Datuk Seri Tiong King Sing madah, dikena nyampai juluk nya, inisiatif enggau kerejasama rat semua raban beguna amat.
Iya madah, nya nyengkaum Perintah Besai, perintah nengeri sereta raban bekaul nyengkaum gerempung ukai dikuasa perintah (NGO) enggau orang kediri.
“Sektor dagang temuai enggau budaya ngesan pangku pengawa besai mantu ngemansang ekonomi Malaysia seraris enggau pengerembai ekonomi kemaya hari.
“Borneo kelebih agi Sarawak dikelala ba serata dunya ngembuan mayuh biodiversiti lalu endang nyadi tanggungpengawa semua mandang enggau nyaga reta berega nya,” ku iya.
Tiong mansutka jaku nya lebuh teks jaku iya dibacha pengari iya, Sekeretari Politik Premier Sarawak, Joshua Ting Fu Ying rambau Program Bejadi Karnival Main Asal Durin 2024 ba Tebing Pasar During ditu, empai lama.
Iya ngelalau semua tuai komuniti, tuai opis enggau ejensi Perintah Besai, perintah nengeri sereta semua serak komuniti ba Pasar Durin terus negap enggau ngintu seni, main asal enggau pesaka bansa enggau manah.
Terang iya, reta berega nya nadai ulih diganti lalu deka ditampung rebak baru ngambi enda punas kelimpah nyungkak ngagai sektor dagang temuai bepelasarka pesaka.
Bela datai, Chairman MDLBS, Kaunsilor Sempurai Petrus Ngalai sereta Chairman Pengatur Karnival Main Asal Durin 2024, Kaunsilor Datuk Teo Boon Siew. – EDISI UKAS
