Kededua menua deka disambung nengah jalai darat enda lama agi
KUCHING: Menteri Dagang Temuai, Seni, Main Asal, Nembiak enggau Lumba Datuk Abdul Karim Hamzah andal Nengeri Sarawak enggau Jakarta di Indonesia deka disambung nengah jalai darat enda lama agi.
“Taja perambu tu agi dalam randau, tang kitai bisi amat pengandal pekara tu deka nyadi nyata laban ke diatu kededua menua disambung jalai naka Pontianak aja.
“Tu mega dikena nangkup peminta mensia mayuh ti deka bejalai mindah enggau nemuai ukai semina napatka menua Kalimantan aja, tang selampur Indonesia.
“Taja pia, semua tu agi dalam randau lalu kami naka ulih ngemujurka perambu sereta nangkup peminta rayat,” ku iya madah nyemetak.
Iya mansutka jaku tu lebuh pengawa bejadi Malam Dua Budaya Agenda Pesaka Pintar Old Kuching 2019 ba Tebing Ai, malam kemari.
Ku Karim, nengah atur pengerami Malam Dua Budaya ulih ngerapitka agi sintal kaul kededua menua.
“Nengah pengerami baka tu mega ulih matak penatai mayuh agi temuai kitu kelimpah ngerapitka kaul bebaik sereta ngelala adat enggau main asal dikemisi Sarawak enggau Indonesia.
Karim mega ngandalka program tu deka ngubah runding peranak menua tu nyadi orang ti pintar agi setipak enggau juluk Perintah Sarawak deka nyapai Mengeri Pintar.
