Kelala adat ari Main Asal

BANTING, Lingga: Raban nembiak rebak baru enda tau enda diperansang belajar enggau angkunka main asal Iban ngambika ulih ditampung sereta bisi dipeda rebak dudi.

Ku penemu Pemungkal Projek Pensel Norina Umoi Utot, bala nembiak Iban patut siruka main asal diri baka belajarka tanda asal (ajat), betabuh, nebah belikan enggau gendang, bepantun, beramban enggau mayuh agi ke bukai.

Kebuah pia ngambika main asal tu enda retai diempa panas, enda sebah diempa ujan ketegal seruyut ubah dunya kemaya hari, ku Norina nampung.

“Nampung jaku sida ke tuai, baka ijok tampung penduk, baka rutan tampung danan, baka ira tampung lemba, baka wi tampung tali. Pechah periuk tanah ganti periuk tani, padam bulan diganti matahari, parai orang ke tuai ganti tubuh kami, pambu orang ke dulu ganti rebak dudi.

“Nya alai awak Gawai Dayak taun tu kami sebuat dulu ngempung enggau nibak penemu lalu teulihka runding ngatur pekit main asal ungkup nembiak mit dientudika aum nyiri komiti pengatur enggau ngelangkar isi pengerami.

DATAI BA PENYANGKAI… Tim Projek Pensel diuluka Norina sangkai ba jelatung Rumah Bruen rambau pejalai ngabang kia nyerumba Gawai tu tadi.

“Juluk kami sebuat deka nerenakka ulah angkun enggau bebasaka main asal enggau ngepan asal ngagai rebak baru nengah pekit ti diatur sereta ngemai sida tu ngelala pun penatai asal sida.

“Main asal tu mega nyeremin adat basa kitai bansa bepelasarka daya idup aki ini kitai kelia,” ku Norina ti mega Chairman Projek Pensel.

Iya mansutka jaku tu nikalka kenang pemujur pejalai sida sebuat ngabang enggau ngintu Gawai Dayak di Rumah Bruen, Dampa Padang, Banting Lingga, Sri Aman ditu kena 2 Jun tu tadi lebuh dirandau Suara Sarawak.

Ku Norina, ari perais pekit ti disedia bala komiti pengatur mega nyadika peransang bala nembiak nyapai penyulut, bepekit ngena chara ti patut enggau pangan diri, kelimpah ari pemujur ba pelajar.

“Kitai dekaka rebak baru tu regas, ngembuan runding kelas satu sereta pintar ngerebut peluang ti bisi ngambika sida seruran nyikap diri napi pemar dibai pemansang dunya moden.

TUAI PENGABANG… Bala indu dara bebajik ngerasuk ngepan Iban lebuh ngelalu penatai bala pengabang diuluka Norina, ba mua pintu penama rumah panjai sida.

“Kitai mega dekaka sida tu ngasika jaku ajar berengkah ari umur biak, nya kebuah kitai chukup keran ngiri penemu, ngembing sida nyingkang nengah jalai ti betul nuju pemujur.

“Lalu ari main asal sereta ngelala asal penatai diri laban genap kereban ngepan bisi tuju sereta penti, tau nyadika lalau kelimpah nempa disiplin sida,” ku Norina.

Ngelansa pasal Pekit Kumang enggau Keling Gawai ungkup nembiak mit beumur lapan ngagai 13 taun, nyendiaka perais RM300 ngagai pemenggi gelar Kumang enggau Keling seraya penuduk lumur dua nerima RM200, lumur tiga RM100 enggau sagu ati RM50.

Atur pekit mega netapka pemekit enda tau enda bansa Dayak, ngerasuk ngepan asal Iban sereta ngembuan pengelandik ba main asal enggau penau bukai.

“Sida tu diuji ari penau enggau pengelandik ba main asal baka betabuh enggau ngajat sereta ke bukai kelimpah pemintar enggau pengelanchat nyaut tanya.

ADAT BASA… Penatai bala pengabang dilalu ngena Ajat Ngelalu Pengabang ari bala nembiak.

“Tu dikena matih sida berunding chara manding pekara belalauka chunto ngena penemu nipakka umur sida laban kitai deka meda utai dipelajar ba sekula lalu tu sebagi ari juluk Tim Projek Pensel, ngansah runding nembiak ari renggat tumu,” ku Norina madah nyemetak.

Kelimpah ari nya, pekit ngajat enggau belagu karaoke mega bisi diatur dikena ngerichahka agi atur pengerami kami lemai nya.

Ngelansa pasal rintai program ti dipungkal penatai bala temuai enggau pengabang ti dipebasa urung pukul 2 lemai disambut enggau ai basu kaki, tuak Gawai sereta Ngajat Ngelalu Temuai.

Pengudah semua terenah duduk, tibar jaku pengelalu ari Tuai Gawai, Tuai Rumah Bruen, ditangkan enggau jaku Tuai Pengabang, Norina Umoi Utot empu.

Tembu bejaku, bala pengabang lalu dinahka pemakai enggau ai irup sereta belepa enda lama sebedau program Projek Pensel berengkah diatur urung pukul 4 lemai.

REBAK BARU… Bala penyereta Pekit Kumang (Nembiak Mit) berintai nganti gintir diri.

Udah nya bala pengabang dibai berami ngena main asal enggau beranyai lalu diangkat ngajat ngelingi rayai sereta nyarau buah ranyai sebedau dibai ngetu belelak tama ke bilik, mandi enggau ngintu diri.

Muakka malam urung pukul 8, semua pengabang enggau sida serumah pansut ke ruai, duduk begelumu meda Pekit Karaoke, Pekit Kumang enggau Keling (Nembiak Mit) sereta Pekit Ngajat Beraban enggau Fashion Show: Ngerasuk Ngepan Asal ungkup orang besai tuai.

Tembu semua main enggau pekit dientudi pengawa nyuaka perais ngagai pemenang Pekit Kumang enggau Keling, nyeradak ai pengayu genap pukul 12 tengah malam sereta program pemerindang dataika pagi.

“Rindu meda bungah sida ke tuai ngelangkung bala ke nembiak, bebuti enggau begagai endang udah adat kitai berami di rumah panjai lalu tu ngasuh ati aku gagit amat begawai di menua.

“Taja menua Banting tu mar dilawa, semina nengah jalai ai, nepan perau panjai, bala aki (jagu) enda ibuh sebut ti ngeredai diri sebelah tebing, amat asai digenggam semengat.

BASA PENGABANG… Siku pengabang ari Tim Projek Pensel dibatak ngajat ngelingi ranyai.

“Tang bai ati keran, ati gauk enggau taluk deka begulai enggau bala ditu, ngasuh ati kering nemuai kitu, napat sereta ngabas sida semenua,” ku iya nusui pejalai sida sebuat kin.

Ku iya, sedarka pemerinsa ditapi peranak ditu maya mindah, betatika pengelikun sida merau ngena injin sepit ngili ai Lingga napatka pasar pemadu semak, Pasar Lingga tauka ngelawa Pasar Simanggang, iya besemaya enggau diri empu deka naka ulih ngemai pemansang enti diberi peluang jemah.

“Pekara dulu dirumban aku ila iya nya penyikap perengka guna pemun baka bekal ai beresi, jalai alun ti meruan enggau bekal kuasa karan, baru berundingka pemansang bukai.

“Tiga pekara tu; bekal ai, jalai enggau karan, pemadu beguna laban tu meri pengelantang ngagai sida, lalu matak pemansang bukai datai kitu nyengkaum ba pekara pelajar enggau industri betanam betupi ti semak ba ati rayat,” ku Norina madahka pengandal diri.

Nangkan nya ku iya, pengawa berasai lempung endar laban semua meri kerejasama enggau besaup ngereja kelimpah meri anak penemu ngambi pengawa muntang sereta lanchar.

RICHAH RAMI… Yen dipebasa ngetas sekeda buah ranyai ngarika Tim Projek Pensel.

“Aku meri tabi puji enggau terima kasih besai ngagai Rumah Bruen serumah ti udah nerima penatai basa kami, diasuh diau bemalam baka ba rumah diri empu, dilalu niki baka pemesai, dibai tama ke bilik baka diri sebilik, dinah pemakai baka temuai, chukup intu baka nyambut menantu.

“Pemanah budi kita serumah semampai kami kenang seagi seput dikuan ba dada lalu ngarapka kaul kitai meruan tegap, teguh baka sintal tali mati, enda mudah retai enggau tebererak ngapa.

“Pia mega nuju bala bukai kelimpah tim Projek Pensel empu ti udah ngempung tulang gawa ngemujurka pengawa kitai sekali tu, nadai kala sebanaka diri lelak, enda mantul ati sereta chukup kering semengat,” ku Norina nyimpul jaku diri.

Sama datai ngabang bala tim Projek Pensel nyengkaum Sapit Chairman James Lungkong, Sekretari Yen Jebeni, Tukang Wang Bonie Langkop, Kaban Komiti Lawrence Temba sereta bala bukai.

BATANG KENANG… Norina ti nyadi Tuai Pengabang ngarika sida sebuat ngetas abis buah ranyai lalu ngerebahka pun ranyai.

 

TEMEGAH… Norina begambar ungkup kenang begulai enggau bala penyereta pekit disempulang bala bukai.

 

NYULUT… Pemenang Pekit Keling ungkup nembiak mit nerima perais ari Norina seraya dikemata bala bukai.

 

KENANG MANIS… Tim Projek Pensel begambar bebala mayuh begulai enggau peranak Rumah Bruen ungkup kenang dudi hari.

 

ANGKUN… Norina temegah mantaika pengelandik diri ngajat ngelingi ranyai ba mua mayuh.

Suara Sarawak