Kelala guna, bansa tajau ba daya idup Iban

UTAI pemadu besai bendar guna dikembuan bansa Dayak Iban kenyau ari kelia menya nyentuk sehari tu nadai lebih ari pemerani, pemulih padi enggau pemulih tajau.

Serak tu Suara Sarawak mai kitai ninjau pemesai reti enggau guna sereta bansa tajau ba daya idup bansa asal menua ti chukup dibasa enggau besai rega.

Enti sema orang nya berani lalu iya bumai bulih padi lalu tebelika tajau ngena padi ke lebih empa, orang nya tau dikumbai kitai Raja Berani.

Iya ga raja, iya ga berani. Nya alai iya sigi digelar orang mayuh enggau gelar ‘petang pah kiba, betelaga ba tengah tapa’.

Nyadi enti orang nya semina naka berani aja tang enda lantang diau laban enda teulihka padi lalu nadai mega kala meli tajau, orang nya semina naka tau dikumbai Bujang Berani.

ADAT PEMATI… Tajau suah nyadika baya orang parai kelia baka ditemu ba Pendam Batu Anchau, Nanga Peka, Paku, Spaoh pegai Bagi Menua Betong.

Kebuah iya tau dikumbai kitai bujang berani laban jari iya udah kala dicharengga darah munsuh.
Ambika chunto lebuh Gawai Tajau didiri, dia orang ke berani diasuh duduk mangkang pandung tajau sereta nanggung tajau ari bilik ke ruai lalu nanggung ari ruai ke bilik.

Kebuah alai iya tau diasuh ngereja pengawa nya laban iya udah ngereja pengawa chukup ba niat ati Iban.
Nyadi tajau tu bisi mayuh bansa tauka nama sereta bisi tingkah rega. Bisi tujuh bansa tajau pemadu tinggi rega ba raban bansa Iban iya nya Tajau Guchi, Tajau sergiu, Tajau Ningka Petanda, Tajau Menaga, Tajau Rusa, Tajau Salang-Alang enggau Tajau Alas.

Sekeda ari guna tajau ba pengidup kitai iya nya ke baya ba Adat Pemati, mayar ukum ba Tusun Tunggu enggau nyadi Soldadu Diau, dikena ba pengidup sehari hari baka endur nyimpan ai.

Kelimpah ari nya, tajau tu mega dikena lebuh bisi nirika gawai besai baka Gawai Tajau, Gawai Kenyalang enggau ke bukai sereta nyadika upah ngagai tukang sabak, lemambang enggau manang.

Ngelansa silik pasal tajau ke besai agi nama dikumbai kitai Tajau Guchi lalu tajau tu mayuh bansa enggau penama. Tajau Guchi tu jarang bendar dikembuan kitai Iban laban iya setengah antu, tau bisi tau mega nadai.
Bisi dikumbai Guchi Daun Tuak ke alai bulu iya chelum lalu bisi dikumbai Guchi Bulan ti ngembuan bulu memiang kelimpah Guchi Chenanum.

DIPIRING… Sida ke agi megai pengarap lama endang semampai miring dikena meri makai enggau ngintu semengat tajau nya.

Nangkan nya kitai ngenang pasal Tajau Sergiu ke alai bulu iya mansau chelum, pending iya melintang. Sergiu tu bisi dua bansa enggau ke lelaki besai agi ari ke indu kelimpah iya ke indu kurang agi ukir.

Nyadi bansa ukir Tajau Sergiu tu iya nya mandangka langkar Bungai Terung enggau Tali Marau bebelit-belit, melit benung tajau nya lalu ukir nya dikumbai orang ukir Papan Gasing.

Udah nya kitai beratika Tajau Ningka Pertanda ti pending iya melintang. Tajau tu bisi ukir Bungai Terung enggau ukir Tali Marau bebelit-belit, melit benung tajau nya.

Iya bisi Papan Pertanda ti nyilih Papan Gasing ke mida Tajau Ningka Pertanda enggau Tajau Sergiu.
Sebengkah agi bansa Tajau Ningka dikumbai Ningka Malak. Iya enda berekung lalu gamal iya nyauka baka tepayan tang enda ga nyadi.

Tajau Menaga ngembuan ukir benaga, bulu iya mansau kundung, pending bisi lapan iti unjur seraya beukirka Bungai Terung Bulu Sengayuh.

Bebida enggau Tajau Rusa ti ukir bebingka, bulu kuning enggau pending lapan iti unjur seraya Tajau Salang-Alang bisi baka gamal Tajau Rusa tang pending iya semina tujuh iti aja lalu Bulu iya kuning.

Tajau Alas ngambi gamal Tajau Rusa tang iya mit agi ke alai pending iya bisi tujuh iti.
Mayuh ga bansa tajau bukai tang nama enggau rega sida mit agi ari sida ke udah kena lansa tadi laban tajau tu suah nyadika pengeraja ba bilik penaik kitai siku-siku.

Ungkup penerang, enti kelia tajau ti dipechaya bisi semengat lalu enda tau enda diberi makai tauka dipiring kelebih agi enti bisi gawai besai didiri kelimpah kitai ngintu Gawai Dayak.

Ketegal mayuh ari kitai diatu ngelengkaka adat enggau pengarap lama laban nerima pengarap baru ngujungka rebak baru mayuh enda ngelala bansa keresa lama baka tu.

Berindik ari nya, kitai ngarapka barang sapa bisi ngibun tauka ngembuan tajau ari pesaka aki ini ulih ngintu enggau nyaga manah laban tu mih kelai adat enggau peninggi basa bilik penaik ke ditampung.