MUKAH: Kem Nembiak Mukah bisi pengulih nyadi palan bejalaika mayuh program pemansang nembiak enggau komuniti di pelilih tu, ku Kaban Kunsil Nengeri (ADUN) Tellian, Royston Valentine.
Iya madah, bisi tiga kem nembiak di Sarawak, siti ari nya di Mukah kelimpah Kem Nembiak di Sematan enggau Kem Nembiak Kemuyang di Sibu.
“Nengah pemisi fasiliti tu, kitai patut ngena enggau manah dikena bejalaika aktiviti begulai enggau komuniti.
“Sekeda aktiviti bisi diatur di Kem Nembiak Mukah iya nya flying fox, niki dinding, kayak enggau ti bukai,” ku iya.
Royston bejaku munyi nya rambau Program Imarah Ramadan Kem Nembiak Mukah 2026 di Tone Cafe ditu, sehari tu.
Nangkan nya, iya muji inisiatif bemacham ejensi perintah enggau gerempung ukai dikuasa perintah (NGO) ti ngena bulan Ramadan tu ngatur program nyaga pengelantang enggau komuniti.
Ku iya, pengawa mayuh raban ngambi bagi mantu sida ti begunaka bantu ukai semina ngelempung tating belanja sida tang mandang semangat begulai ba bulan tuchi tu.
