LAWAS: Penyulut ba pekara pelajar, pengelandik enggau bemacham bansa jaku patut dikemeratka agi ba bala nembiak rebak baru dikena sida napi ubah dunya maya hari tu.
Sapit Premier Sarawak, Datuk Amar Awang Tengah Ali Hasan, madah penyulut nya deka nyikap sida bela ampit ngasaika pemansang ba ekonomi digital, pengawa bedagang enggau ke bukai.

Ku iya, Perintah Nengeri semampai beratika ubah dunya ngambi ulih nyungkak tikas pengidup rayat nengah pekara pelajar enggau dagang.
Iya nerangka pekara nya maya dirandau pemberita ba Pengerami Ngabang Aidilfitri ke diatur Komiti Pemansang enggau Pengelikun Genturung Pendiau (JKKK) Kampung Dato Menegah, Kampung Dato Laut sereta Kampung Dato Ulu di Waterfront Kampung Dato, Kuala Lawas ditu, empai lama tu tadi.
Nambahka jaku iya, Awang Tengah madah Perintah Sarawak mega semampai deka ngemansang sereta ngemanahka perengkaguna baka jalai alun, bekal karan enggau bekal ai ti mai pengelantang ngagai rayat mayuh.
Ba pengerami nya mega, iya bisi meri duit raya ngagai bala pengabang ke bisi datai.






