Kemetul penerang ngasuh rayat saru penemu – Mohammad Razi Sitam

DEBAK: Raban Nembiak Parti Pesaka Bumiputera Bersatu (PBB) Saribas dikeandal ulih bejalaika pangku pengawa meri penerang sentang perambu ngubah Akta Konstitusyen Perintah Besai (Ubah) 2019 enggau betul sereta terang ngagai rayat renggat baruh.

Pengawa tu beguna amat dikena ningkah tuduh enggau dawa sida ti saru penemu pasal pemutus enggau pengawa bala MP Gabungan Parti Sarawak (GPS) apin lama ke udah, pia ku Adun Saribas Mohammad Razi Sitam.

Ba penemu iya, nitihka pematut ubah nya patut berundingka penemu rayat Sarawak ba renggat Dun ti megai pengandal rayat.

“Tang enti ubah ti deka digaga semina lawa kerubung aja, tu diperati enda nangkup peminta enggau juluk rayat Bumi Kenyalang.

“Tu mega nadai ngemai sebarang reti ngagai bidang kuasa Sarawak baka ti udah ditegika Kepala Menteri sebedau tu, niang Pehin Sri Adenan Satem, kelebih agi mulaika kuasa baka disempekat ba Sempekat Malaysia 1963 (MA63),” ku iya.

NEMBIAK SARIBAS… Mohammad Razi Sitam disempulang bala kaban Nembiak PBB Pampang Saribas begambar ungkup kenang pengudah tembu baum sehari tu.

Iya mansutka jaku nya lebuh dirandau pengudah aum begulai enggau raban Nembiak PBB Pampang Saribas di Palan Servis Adun semak ditu tadi.

Ku iya, penetap penemu bala MP GPS diketuai Ketuai Whip GPS Dato’ Sri Fadillah Yusof ngarika Sarawak endang patut ba pengawa mulaika penuduk Sarawak nyadi sebuah wilayah ti numbuhka Malaysia.

“Kitai nyukung tang patut mungkur semengat ti bisi dalam MA63 dibacha begulai enggau Ripot Komiti Entara Perintah (IGC) enggau Konstitusyen Perintah Besai.

“Sarawak dekaka ubah kesemua pekara ngaul hak ti patut dipulai lalu ukai semina nukar status nama nyadi bakih kunsi aja.

“Nya kebuah, ba pekara tu rayat patut meretika peminta ubah nya nitihka pekara ti patut dataika pengari kitai di Parlimen netapka penemu diri enda ngundi 9 April tu tadi,” ku iya.

Ku Razi nambah, Perintah Besai mega patut lurus agi ba pekara tu.

Iya ti mega Ketuai Pampang PBB Saribas dekaka pekara nya diterang enggau betul.

“Ke diatu, jaku melit mayuh amat ditabur dataika rayat saru penemu.

“Nya alai aku ngarapka rayat di Saribas nemu pasal pekara tu lalu anang mendingka penerang ti salah, sengaja ngamah enggau ngemaruh nama Perintah Sarawak.

“Kepala Menteri Datuk Patinggi Abang Johari Tun Openg ti ngembing Bumi Kenyalang deka nentuka hak enggau pengelebih rayat enggau nengeri tu seruran ditan enggau semengat Beratka Sarawak,” ku iya madah nyemetak.

Nangkan nya ku iya, sida deka seruran ngatur pejalai ngaul semak rayat renggat baruh.

Pengudah tembu baum, Razi nyuaka pemeri kereban lumba baka bol, futsal enggau takraw ngambi aktiviti nembiak chakah agi dipejalai dia.

Sama datai Ketuai Raban Nembiak PBB Pampang Saribas Mahdir Seliman.

Suara Sarawak