KUCHING: Kepala Menteri Datuk Patinggi Abang Johari Tun Openg bisi ngatur penerebai ngagai Darwin di Northern Territory (NT), Australia nemuai ke stesyen chapi Rosewood di Rosewood di Australia Barat ti diempu Kaunsil Pemansang Ekonomi Sarawak (SEDC) ujung minggu tu tadi.
Rambau penemuai nya, Kepala Menteri enggau bala bukai diberi penerang raban gawa ngintu stesyen pemansang ba dia lalu dibai bejalai ngabas bemacham perengka guna ba ladang sejuta hektar pemesai ti diulih dalam taun 1982.
Lebuh sida mulaika diri ke Darwin pengudah dua hari bejalai gawa ke Stesyen Rosewood, sida dibai nemuai ke Stesyen Kerita Api Carmor peribit ti mungkur 100,000 ekar pemesai ti deka dibeli SEDC.
Stesyen tu besemak enggau Darwin lalu deka nyadi rumah jelu siga enggau jelu tupi baka kerebau, rusa, chapi enggau baya lalu penyampau kerebau bisi ba stesyen nya urung 2,500.
Stesyen tu mega deka nyadi palan ngasuh jelu ditupi gemuk ti diangkut ari Stesyen Rosewood ungkup eksport enggau stesyen nupi kerebau ti deka dianjung ngagai Limbang ngambika dilepas.
Ba Darwin, sida sebuat udah dibai bejalai nemuai meri basa ngagai Kepala Menteri NT, Michael Gunner.
Randau pengelama 45 minit bejurai bemacham isu berat begulai enggau NT enggau Sarawak.
NT bisi 250,000 peranak enggau diari dua senator ba Parlimen Australia lalu Parlimen NT bisi 22 iku kaban.
Eksport besai NT iya nya LNG, mineral enggau chapi sereta dagang temuai mega nyadi pemansut belanja besai sida.
Bela nyempulang pejalai nya Sapit Kepala Menteri enggau Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas, Menteri Muda Betanam Betupi Abdul Rahman Ismail enggau Chairman SEDC Dr Abdul Aziz Hussein.
Bala bukai nyengkaum Sekretari Mendam Opis Menteri Betanam Betupi Moden, Tanah Adat enggau Pemansang Kandang Menua Datu Ik Pahon Joyik enggau Menijar Besai SEDC Abdul Hadi Kadir.
