Kerejasama dipejalai mai pulai anak Sarawak ari China

BINTULU: Perintah nengeri deka bekerejasama enggau Duta Malaysia di Beijing ngelala sereta nentuka penyampau nembiak Sarawak di China lebih agi Wuhan.

Kepala Menteri Datuk Patinggi Abang Johari Tun Openg madah, naka tu penyampau nembiak ke bisi ba kandang menua nya bedau temu.

“Kitai enda nemu penyampau nyemetak nembiak ari Sarawak ba China, tang kitai deka bekerejasama enggau duta besai Malaysia ba Beijing matau sentang bala nembiak kitai tu,” ku iya maya dirandau pasal penyampau rayat nyengkaun nembiak Sarawak ke agi tepagang ba Wuhan.

Iya madah pagi kemari, iya udah berandau enggau Sapit Kepala Menteri Datuk Amar Douglas Uggah Embas lalu deka matau enggau silik penyampau rayat Sarawak ba China.

Abang Johari mega madah, Perintah Sarawak seruran sedia mantu lalu mai pulai sida ke nengeri tu.

“Taja pia, pengudah sida pulai ila, sida deka dikurung ba begunan ke bedau ditetap,” ku iya.

Abang Johari madah munyi nya ngagai pemberita beserimbai enggau Pengerami Ngelalu Pengabang Taun Baru China Kaban Parlimen Bintulu enggau Parti Demokratik Progresif (PDP) di Dewan Suarah ditu.

Bela bisi datai Tuai Pemegai Menua (TYT) Tun Abdul Taib Mahmud enggau ex-TYT Tun Abang Muhammad Salahuddin Abang Barieng enggau bini iya, Toh Puan Norkiah.

Suara Sarawak