KUCHING: Perintah Sarawak deka nerus kerejasama enggau Perintah Besai sereta Perintah Indonesia dikena nempa dagang adan kededua menua nya.

ADUN Batang Ai, Datuk Dr Malcolm Mussen Lamoh madah, pengawa mansik Sempekat Meraka Adan (BCA) 1967 enggau Sempekat Dagang Adan (BTA) 1970 deka dipejalai.

“Perintah Besai udah ngemendar agih belanja RM100 juta dikena numbuhka Kompleks Imigresyen, Kastam, Kuarantin enggau Pengelikun (ICQS).

“Naka diatu, projek tu benung ba renggat ngaga langkar tengkebang,” ku iya rambau Aum Kunsil Nengeri (DUN), sehari tu.

Iya madah, dagang adan ngembuan pengulih besai deka dikemansang lebuh ICQS ti baru mujur tembu ila.

Pia mega, iya madah, pansik Pelin Besai Serian 2020-2030 udah ngelala Sitak Industri Tebedu (TIE) deka nyadi hab kilang Bagi Menua Serian.

“TIE deka ngena ladang getah ba Kalimantan dikena bejalaika pengawa nginjin getah renggat ili,” ku iya.