Penumbuh Opis Dagang enggau Dagang Temuai nyadi pelasar kerejasama Sarawak-Singapore

“Siti ari pekara diperati iya nya dalam pengawa mansutka pemakai ari pengawa betanam betupi alai ulih meri penguntung ngagai dua bengkah menua tu.”

KUCHING: Kerejasama Sarawak enggau Singapore dikeandal ulih nyungkak agi pengerembai ekonomi nengeri tu.
Menteri Pengawa Dagang enggau Industri ti mega nyadi Menteri Pelajar Singapore, Chee Hong Tat madahka penumbuh Opis Dagang enggau Dagang Temuai di Singapore ulih nyadi siti pelasar kerejasama nya.

“Aku enggau Kepala Menteri Datuk Patinggi Abang Johari Tun Openg berandau bekaul enggau sebengkah ari pekara ti ulih meransang ekonomi dua bengkah menua tu.

“Siti ari pekara diperati iya nya dalam pengawa mansutka pemakai ari pengawa betanam betupi alai ulih meri penguntung ngagai dua bengkah menua tu,” ku iya.

Hong Tat madah munyi nya pengudah pejalai nemuai meri basa ngagai Abang Johari ba opis iya di Wisma Bapa Malaysia ditu, kemari.

Nangkan nya ku iya, Sarawak ngembuan penau ti chukup tinggi dalam nyadi menua pemansut pemakai ti bekualiti.
“Beduduk ari pekara tu, sebengkah ari kompeni menua kami nyangka bisi juluk ati deka beranakka puku ba menua tu.

“Tu kelebih agi ba pengawa ngaga pemakai, ekport pemakai ngagai menua luar sereta ke bukai,” ku iya.

Kelimpah ari nya mega ku Hong Tat, sebagi agi pekara nyadi perati iya nya ba pengawa dagang temuai.

“Kami mega berandau bekaul enggau pengawa nampil makit dagang temuai entarabansa kelebih agi dalam ngelakuka dagang temuai dua bengkah menua ngagai menua luar ke bukai,” ku iya.

Seraya ku Hong Tat pekara ti pemadu beguna dalam kerejasama tu iya nya chara deka nerenakka kaul dalam tiga renggat.

“Tu nyengkaum antara perintah, entara dagang enggau antara mensia mayuh.

“Nengah kaul tiga pekara tu, kitai ulih nerenak mayuh agi pengeraja, muka mayuh peluang sereta penguntung dalam dagang ngagai rayat menua kitai,” ku iya.