Kerepek Tempe Pontianak nyelai ari pemakai bukai

KUCHING: Produk Tempe Chips ari Pontianak nyelai ari chara mela tempe sereta nyamai diempa kena betunga enggau berandau maya lepa.

Natalia, 37 taun, penemu nyual kerepek tempe tauka tempe chips tu bepun ari ulah iya empu ti rindu makai kerepek baka pemakai bukai.

“Aku rindu makai kerepek, ari tu aku teulihka runding ngaga kerepek lalu dijual nyadi pemakai.

“Kilang kerepek tempe di Pontianak nginjin tempe dataika nyadi kerepek lalu dikereja begulai enggau bakih aku,” ku iya.

Jaku tu dipansutka iya lebuh dirandau Suara Sarawak ba bangsal bejual nyerumba Pengerami Wonderful Indonesia (WIF) 2019 di Tebing Sungan Kuching, kemari.

DAGANG MAJU… Natalia mantaika produk kerepek tempe ti bisi dijual iya ba bangsal mandang di tebing ai Kuching ditu nyerumba WIF 2019.

Ku Natalia, iya nyual produk kerepek tempe ngelingi mengeri Kuching lalu juluk ati iya deka ngemesaika dagang enggau makit produk sereta deka ngaga tempe ‘vegetarian’ tauka ari sayur aja.

“Naka diatu, produk bisi dijual ngelingi mengeri Kuching nyengkaum di Padungan, Majma’ Mall enggau ke bukai, juluk aku ngemai produk rembus ngagai makit besai agi.

“Untung kasar kurang lebih RM1,000 sebulan, dijual ngena rega RM5 setungkus,” ku peranak asal ari Pontianak, Indonesia nya.

Iya madahka diri suah nerima udar sereta peminta ari orang luar maya nyereta pengawa mandang ti diatur raban sida dedin.

Kelimpah ari kerepek tempe, iya mega bisi nyual produk batik ti nyadi dagang sida sebilik sereta baju dero enggau kereban penganta sida ke indu.

LAKU… Kerepek tempe nerima peminta tinggi ngelingi mengeri Kuching lalu deka rembus ngagai makit besai agi jemah.

 

TEMEGAH… Entara produk bisi dijual Natalia nyengkaum kerepek, kain batik, baju dero enggau kereban penganta sida ke indu.