KUCHING: Sarawak ngerikodka kes baru positif Covid-19 pemadu mayuh di Malaysia kemari iya nya 426 kes kelimpah bisi dua kes pemati baru.
Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka kes baru positif ti dirikodka tu iya nya ba Pelilih Menua Serian (203), Bintulu (72), Kuching (41), Sibu (31), Miri (21), Samarahan (13), Julau (11), Song (8), Kapit (6), Pakan (3), Sarikei (3), Sebauh (3), Sri Aman (3), Kanowit (2), Meradong (2), Betong (1), Limbang (1), Mukah (1) enggau Selangau (1).
“Tu ngujungka penyampau kes positif ketegal Covid-19 di Sarawak nambah 15,869 kes.
“Pia mega, dua kes pemati ti dirikodka tu ngujungka sepenyampau 103 iku pemati ketegal Covid-19 naka diatu,” ku iya nengah Aum Pemberita Covid-19 di Dun Lama ditu, kemari.
Ku Uggah, kes pemati ti ke-102 ngaul siku lelaki beumur 77 taun ti dipasukka ba Sepital Sibu sebedau ditemu positif Covid-19 kena 2 March.
Iya udah nya madahka, ba kes pemati ti ke-103 mega ngaul siku lelaki beumur 63 taun ti dipasukka ba Sepital Sibu ketegal sendat seput sebedau ditemu positif Covid-19 kena 19 March.
Ngelansa kes baru positif kemari, iya madahka ari 426 kes, 203 kes nya ari Serian ke alai 191 kes ditemu ari Depot Orang Ditangkap Imigresen Semuja.
“Sepenyempau 82 iku ari sida nya pengereja Imigresen.
“Naka diatu Depot Orang Ditangkap Imigresen Semuja udah ngetan 462 iku orang ke alai 433 iku ditemu positif Covid-19.
“Kes tu nunjukka virus Covid-19 majak ngerekai ketegal orang nadai nyaga takah ari pangan diri,” ku iya.
Ku Uggah, pekara nya nyemetak dipeda lebuh Palan Depot Orang Ditangkap Imigresen Semuja ti semina ulih endur engkah 75 iku dalam sebuah bilik enda dititihka.
“Terima kasih ngagai orang ti nitihka Atur Pengawa Standard (SOP) tang agi sekeda rayat Sarawak enda nitihka SOP tu.
“Nya ngujungka kenyau bulan Januari taun tu, kitai meda kes positif Covid-19 di Sarawak majak nambah ketegal pengawa rabat enggau gempuru bebala mayuh enda nitihka SOP,” ku iya.
